Шолц - Украинада тинчлик жараёнига ўтишни тезлаштириш тарафдори

Германия канцлери Олаф Шолц Украинада тинчлик жараёнига ўтиш жараёнини тезлаштириш тарафдори эканини айтди. Вазирлар маҳкамаси раҳбари бу позицияни ZDF нашрига ёзги катта интервюсида айтиб ўтди, ундан парчаларни канал 8 сентябр, якшанба куни ўз веб-сайтига жойлаштирди.

«Ўйлайманки, ҳозир қандай қилиб биз бу ҳарбий вазиятдан тезда чиқиб, тинчликка эришишимиз мумкинлигини муҳокама қилиш вақти келди», деб таъкидлади Германия ҳукумати раҳбари.

Шолц Россиянинг иккинчи «тинчлик саммити»да иштирок этишини қўллаб-қувватлайди. Унинг биринчиси июн ойида Швейцариянинг Бюргеншток курортида бўлиб ўтди. Канцлер сўзларига кўра, Москванинг ҳозир бўлиши зарурлиги масаласида Берлин Украина президенти Володимир Зеленский позициясига қўшилади. «Албатта, яна бир тинчлик конференцияси бўлади», деди у, аммо аниқ саналарни кўрсатмади.

Германия вазирлар маҳкамаси раҳбари Зеленский билан махфий суҳбатлашганини айтди. У билан яхши муносабатлар бор, деб таъкидлади Шолц.

Шолц ишонч вотумини зарур деб ҳисобламайди

ZDF нашрига берган интервюсида канцлер Германиянинг ички муаммоларига ҳам тўхталиб ўтди.

Германия Социал-демократик партиясининг Саксония ва Тюрингиядаги сайловларда ёмон натижалари ва ҳатто партия томонидан танқид қилинганига қарамай, Шолц ишонч вотумини зарур деб ҳисобламаяпти. Канцлер бу борадаги таклифларни тахминан ҳар «уч ҳафтада» такрорланадиган «мухолифатнинг кичик ғояси» деб таърифлади.

«Ҳукумат кўпчиликка эга», деб таъкидлади Шолц. Унинг қўшимча қилишича, вазирлар маҳкамаси «Украинани қўллаб-қувватлаш учун» қўлидан келганини қилади. Унинг фикрича, Саксония ва Тюрингиядаги сайлов натижалари «айрим фуқароларнинг Украинани қўллаб-қувватлашимизга рози эмаслиги билан ҳам боғлиқ».

Германия канцлери «кейинги федерал сайловларда кучли мандат олиш» учун курашмоқчи эканлигини айтди. «Биз бир марта муваффақиятга эришдик», деди Шолц ва партияни «жангда суяги қотган партия» деб атади. Парламент фракциясининг танқидига қарамай, партияда бирдамлик сақланиб қоляпти, дея қўшимча қилди Шолц. Бундестагга сайловлар 2025 йил 28 сентябрда бўлиб ўтади.

Зеленский Ҳиндистонда тинчлик саммитини ўтказиш ниятида

Украина президенти Володимир Зеленский Ҳиндистонда тинчлик саммитини ўтказиш таклифини билдирди. Давлат раҳбари ушбу таклифини Ҳиндистон бош вазири Нарендра Моди билан учрашувда илгари сурган, деб хабар беради Bloomberg.

Зеленский ноябр ойида АҚШда ўтказиладиган президентлик сайловларидан олдин иккинчи учрашувни ўтказишни режалаштирмоқда. Манбаларнинг қайд этишича, Моди ҳозирча бу турдаги саммитни ўтказишга розилик бермаган. Зеленский матбуот котиби Сергей Никифоровнинг маълум қилишича, кейинги саммитни жанубий давлатлардан бирида, хусусан, Ҳиндистонда ўтказиш имконияти кўриб чиқилмоқда.

Ўз навбатида Моди тинчлик жараёнида «конструктив рол» ўйнашга тайёрлигини билдирган, бироқ Ҳиндистон ТИВ вакили Рандҳир Жайсвалнинг сўзларига кўра, «бу босқичда аниқ механизмлар ва йўллар ҳақида гапиришда жуда эрта».

Моди 23 август куни Киевга ташриф буюриб, Украина суверенитетини қўллаб-қувватлашини билдирган эди.