Ветнамда «Яги» супертайфуни ёпирилиши оқибатида серқатнов кўприк қулаб тушди

Ветнам бош вазири ўринбосари Хо Дик Фок «Яги» супертайфуни ёпирилиши оқибатида мамлакат шимолидаги серқатнов кўприк қулаб тушганини маълум қилди. Ҳодиса оқибатида 10 та автомобил ва иккита скутер сувга қулаган.

Қайд этилишича, Фонг Чау кўпригининг қулаши оқибатида камида уч киши ҳалок бўлган, 13 киши бедарак йўқолган. Узунлиги 375 метрга тенг кўприкнинг бир қисми ҳалиям турибди ва ҳарбий хизматчиларга унинг ўрнида тезроқ пантон кўприк қуриш топширилган.

«Яги» жорий йилда Осиёга ёпирилган энг кучли тайфун бўлиб, Ветнам ҳудудига кириб келганидан бери 60 кишининг умрига зомин бўлди.

Мамлакат Қишлоқ хўжалиги вазирлигига кўра, тезлиги соатига 203 километрга етган тайфун оқибатида юзага келган кўчки ва сув тошқинлари оқибатида камида 44 киши ҳалок бўлган, улар орасида 68 ёшли аёл, бир ёшли бола ва чақалоқ ҳам бор. Шунингдек, 240 дан ортиқ одам жароҳат олган, 1,5 миллионга яқин киши электр энергиясисиз қолмоқда.

Бундан ташқари, қарийб 50 минг киши Ветнам соҳил бўйи шаҳарларидан эвакуация қилинган. 12 та провинциядаги, жумладан, пойтахт Ханойдаги мактаблар вақтинча ёпилган.

«Яги» супертайфуни Ветнамга етиб келишидан олдин Хитой ҳамда Филиппинга ёпирилган ва бунинг оқибатида 24 киши ҳалок бўлган эди.