Хитой ва Россия сентябр охиригача қўшма машқлар ўтказади

Япон ва Охота денгизидаги ҳарбий-денгиз ва авиация машғулотлари доирасида Россия ва Хитой Тинч океанининг бошқа ҳудудларига қўшма денгиз патрулларини жўнатади, дея маълум қилди Пекин.

Фото: Тинч океан флоти ахборот идораси/ТАСС

Хитой шу ойда Россия билан North-Joint 2024 қўшма ҳарбий машғулотлари ўтказилишини эълон қилди. Уларнинг мақсади икки мамлакат ҳарбийлари ўртасидаги «стратегик ҳамкорликни чуқурлаштириш» ва «хавфсизликка таҳдидларга биргаликда қарши курашиш» қобилиятини мустаҳкамлашдан иборат бўлади, деб хабар берди Пекиндаги Мудофаа вазирлиги душанба, 9 сентябр куни.

Ушбу маълумотларга кўра, ҳар икки мамлакат ҳарбий-денгиз кучлари ва ҳарбий авиацияси Япон ва Охота денгизидаги Россия қирғоқлари олдида манёврларда иштирок этади. Улар доирасида «Тинч океанининг муҳим денгиз ҳудудларига» қўшма денгиз патрули юборилади.

Хитой «Океан-2024» Россия машғулотларида иштирок этади

Бундан ташқари, ХХР Россиянинг «Океан-2024» стратегик машқларида иштирок этади, дейилади баёнотда. Уларнинг аниқ санаси маълум эмас.

Россиянинг Украинага қарши давом этаётган уруши фонида Россия ва Хитой иқтисодий, дипломатик ва мудофаа соҳаларида ҳамкорликни кучайтириб, Ғарбга қарши «чегарасиз» шериклик ва ҳамжиҳатликни эълон қилмоқда. Хусусан, жорий йил июл ойи ўрталарида Хитойнинг Чжанцзян порт шаҳри қирғоқлари яқинида икки давлат сувда ва ҳавода қўшма ҳарбий машғулотлар ўтказди.

НАТО, шунингдек, Қўшма Штатлар ва бошқа давлатлар Хитой раҳбариятини Россиянинг Украинага қарши ҳарбий агрессиясини қўллаб-қувватлаётгани учун танқид қилади. Пекин бунга жавобан Шимолий Атлантика алянсини «қарама-қаршиликни қўзғатмасликка» чақирди.