Финландияда Россия ер участкаси хатловга олинди

Россия фан ва маданият марказига қарашли ер участкаси «Нафтогаз» даъвоси бўйича олиб қўйилди. Компания Ҳаагадаги арбитраж томонидан буюрилган товон пули тўланишини талаб қилмоқда.

Фото: Alamy

Финландия суди Ҳелсинкидаги Россия фан ва маданият марказининг ер участкасини хатловга олди, деб хабар бермоқда Helsingin Sanomat газетаси 28 октябр, душанба куни. Нашр маълумотларига кўра, 3326 квадрат метрлик ер участкасини олиб қўйиш тўғрисидаги қарор 24 октябрдан кучга кирди.

Россия фан ва маданият маркази участкаси Украина давлат энергетика компанияси «Нафтогаз» талабига биноан хатловга олинган. У 2016 йилдан бери яриморол қўшиб олинганидан кейин Россия давлати томонидан Қримдаги активлари миллийлаштирилгани юзасидан Россия Федерациясини судга бериб келади. 2023 йилда Ҳаага арбитраж суди Россияга Украина компаниясига 5 миллиард доллар тўлашга мажбуриятини юклади. Россия буни рад этяпти.

Финландия ЕИни Россияни тийиб туришга кўпроқ сармоя киритишга чақирди

Финландия ташқи ишлар вазири Элина Валтонен Европа давлатларини мудофаага кўпроқ сармоя киритишга ва Россиядан келаётган таҳдидни тийиб туриш чораларига чақирди. «Мен Путиндан ҳамма нарсани кутишга тайёрман», деди Финландия ташқи ишлар вазирлиги раҳбари 27 октябр куни Funke нашрлар гуруҳига берган интервюсида.

Келажакда Европа Иттифоқи давлатлари мудофаа учун ялпи ички маҳсулот икки фоизини ташкил этиш бўйича НАТО мақсадидан кўра кўпроқ маблағ сарфлаши керак, дейди Валтонен. Вазирнинг сўзларига кўра, айни дамда Россия Федерациясининг Ғарб билан гибрид уруши доирасидаги асосий нишонлари Германия ва Франция ҳисобланади. Валтоненнинг аниқлик киритишича, Кремл асосий урғуни маҳаллий аҳоли орасида Украинани қўллаб-қувватлаш даражасини пасайтириш учун дезинформацияни тарқатишга қаратган. «Ҳеч ким Украинадан кўра кўпроқ тинчликни хоҳламайди, аммо агар кимдир қурол-яроғ етказиб беришни тўхтатиш орқали урушни тўхтатиш мумкин деб ҳисобласа, мен фақат бир нарсани айтишим мумкин: бу урушнинг тугашига олиб келмайди, бу Украинанинг охирига олиб келади», — деди Финляндия Ташқи ишлар вазирлиги раҳбари Киевни қўллаб-қувватлаш муҳимлигини таъкидлаб.

Шу нуқтайи назардан, Валтонен Германиянинг Россия ҳудудига чуқур ҳужумлар учун Украинани узоқ масофага учувчи қуроллар билан таъминламаслик қарорига изоҳ беришдан ўзини тийди, бироқ халқаро ҳуқуқ ўзини ҳимоя қилишнинг бир қисми сифатида ўз чегараларидан ташқарида ҳарбий нишонларга зарба беришни тақиқламаслигини эслатди. Финландия Украина Қуролли кучлари (УҚК)га 2024 йил май ойида Ҳелсинкидан олинган қуролларни Россия Федерацияси ҳудудидаги нишонларга қарши ишлатишга рухсат берган эди.