Бербок: ГФР Украинага қишки ёрдам учун яна 200 млн евро ўтказади

Германия ташқи ишлар вазири Анналена Бербок Украинага тўлиқ миқёсли уруш бошланганидан бери саккизинчи ташрифи чоғида бу мамлакатга келгуси қиш даври учун қўшимча 200 миллион евро ёрдам ваъда қилди. Бу маблағлар, хусусан, фронт чизиғида яшовчи украиналикларни ёнилғи билан таъминлашга сарфланади, деди у 4 ноябр, душанба куни Киевда украиналик ҳамкасби Андрей Сибига билан қўшма матбуот анжуманида.

Учинчи ҳарбий қиш арафасида турган украиналиклар ўзларини нолдан паст ҳароратлардан ҳимоя қилиш учун зарур бўлган нарсалар билан таъминланиши керак, деди Бербок. Қўшимча инсонпарварлик ёрдами Украина энергетика соҳасини қўллаб-қувватлашга эмас, балки аҳолига қишки фавқулодда ёрдам чораларига қаратилган бўлади.

Бербокнинг сўзларига кўра, урушни бошлаган Россия ҳозир Шимолий Корея томонидан қўллаб-қувватланмоқда, шунингдек, Украина шарқида айниқса кескин ҳаракатларни амалга оширмоқда. У атайлаб ҳаётий муҳим инфратузилмани йўқ қилишга, электр станцияларини бомбалашга ва электр узатиш линияларини йўқ қилишга уринмоқда, деди у. Ҳозирда Украина энергетика инфратузилмасининг деярли учдан икки қисми вайрон қилинган, дея эслатди немис вазири.

ГФР ва АҚШ Киевни НАТОга зудлик билан таклиф қилишга тайёр эмас

Германия ва АҚШ ҳали Украинани НАТОга «дарҳол таклиф қилишга» тайёр эмас. Бу ҳақда 23 октябр куни АҚШ ва Шимолий Атлантика алянсининг тўрт нафар расмий ва дипломатларига таяниб, Politico нашри маълум қилди.

Politico Украина президенти Володимир Зеленскийнинг «ғалаба режаси»да «зудлик билан таклиф» ҳақида гап кетганини эслатиб ўтди, шу билан бирга у алянсга ҳақиқий кириш Россия Федерацияси билан уруш тугаганидан кейингина мумкин бўлишини тан олди.

«Ҳозирча алянс Украинага аъзо бўлиш ёки уни таклиф қилишга тайёр бўладиган даражага етгани йўқ», деди АҚШнинг НАТОдаги доимий вакили Жулианна Смит.