Фарғонада танишини ўлдириб, уйига ўт қўйган аёлга ҳукм ўқилди

Фарғонада танишини ўғирлик мақсадида ўлдирган аёлга ҳукм чиқарилди.

Суд материалларига кўра, аёлнинг кредит қарздорлиги бўлган. У жабрланувчи билан аввалдан таниш бўлган ва уйида пул жамғармаси борлигини билган.

Суд жараёнида таъкидланишича, маҳкум жабрланувчининг кун тартибини — қачон уйни тарк этиши, қачон қайтишини ўрганган. Қайд этилишича, айбланувчининг хатти-ҳаракатлари аёлда шубҳа уйғота бошлаган. У, хусусан, қизини уйда ёлғиз вақтида унга эшикни очмаслик ҳақида огоҳлантирган.

Жиноят 21 май куни, жабрланувчининг қизи мактабга кетганида содир бўлган. Аёл танишининг уйига келиб, жабрланувчига 20 мартадан ортиқ пичоқ урган, сўнг жиноят изларини яшириш учун уй атрофига растворител суюқлигини тўкиб, ўт қўйган.

Аёл уйдан чиқиб кетаётиб, марҳум уй сотиб олиш учун йиғиб юрган 2000 доллар ва тилла тақинчоқларни олиб кетган.

У уйига келгач, қонли кийимини алмаштирган ва пичоқни сойга улоқтирган. Шу куни у 12 миллион сўм миқдоридаги кредитининг бир қисмини ёпган.

Жиноят ишлари бўйича Фарғона шаҳри суди аёлни 15 йилдан ортиқ муддатга озодликдан маҳрум қилди.