Трамп маъмуриятида Украина бўйича махсус вакил бўлади — ОАВ

У тинчликка эришишга қаратилган музокараларда қатнашади.

Фото: AP

Доналд Трамп маъмуриятида Украина бўйича махсус элчи лавозими бўлади, у АҚШ томонининг урушни тугатишга қаратилган музокараларини назорат қилади. Бу ҳақда Fox News манбаларга таяниб хабар берди.

Махсус вакилнинг номи «тез орада» эълон қилинади, деди манбалар. Бу «катта обрўли шахс» бўлади ва «тинч йўл билан ҳал қилишга олиб келадиган ечимларни топиш вазифаси юкланади».

Трампнинг 2017 йилдан 2019 йилгача бўлган биринчи муддати давомида унинг маъмурияти аллақачон Украинада тинчлик музокаралари бўйича махсус элчисига эга эди (кейин у Минск келишувларини амалга ошириш билан боғлиқ эди) - бу лавозимни эгаллаган биринчи ва ягона шахс Курт Уокер бўлган. Байден маъмуриятида бундай махсус вакил йўқ.

Уокер техник жиҳатдан кўнгилли маслаҳатчи ҳисобланган ва давлат хизматчиси сифатида маош олмаган. Fox News қайд этишича, янги махсус вакил ҳам ўз вазифаларини бепул бажариши мумкин.

Сайлов кампанияси давомида Трамп агар президент бўлса, урушни имкон қадар тезроқ тугатишини, Москва ва Киевни музокара бошлашга мажбур қилиш йўлини топишини бир неча бор таъкидлаган.

Финляндия президенти Александр Стубб 12 ноябр куни Трамп билан телефон суҳбатидан сўнг «имкон қадар тезроқ тинчлик келишувига эришишга жиддий ёндашаётганини» айтди. Унинг қайд этишича, бунинг учун Трампнинг 20 январдаги инаугурацияси олдидан яхши имконият бор.

Россия президенти Владимир Путин АҚШ президенти сайловидан кейин Трамп билан мулоқотга очиқ эканини айтди. Washington Post газетасининг ёзишича, ушбу баёнотдан кейин бир неча соат ичида Путин ва Трамп телефонда гаплашган. Трамп Путинни «Украинадаги урушни кучайтирмасликка» чақирган ва Европада АҚШ ҳарбийларининг борлигини эслатган. Кремл бундай суҳбат бўлганини инкор қилди.