Байден Трампга: Украинани қўллаб-қувватлаш АҚШ манфаатларига жавоб беради

Оқ уйнинг Овал кабинетидаги учрашувда Жо Байден ва Доналд Трамп «мамлакат ва дунё олдида турган муҳим миллий хавфсизлик ва ички сиёсат масалаларини» муҳокама қилди.

Фото: Kevin Lamarque / Reuters

АҚШ президенти Жо Байден президентлик сайловларида ғалаба қозонган Доналд Трампга ваколатлар алмашинуви муаммосиз ўтишини ваъда қилди. Уларнинг учрашуви 13 ноябр, чоршанба куни Вашингтондаги Оқ уйда бўлиб ўтди. 81 ёшли демократ ва 78 ёшли республикачи Овал кабинетнинг ёниб турган камини олдида қўл бериб кўришди. «Сиёсат — оғир бизнес ва кўп ҳолларда бу ёқимли дунё эмас. Лекин бугун бу ажойиб дунё ва мен буни жуда қадрлайман», деди Трамп учрашувдан сўнг журналистларга.

Оқ уй матбуот котиби Карин Жан-Пернинг сўзларига кўра, сиёсатчилар ўртасидаги суҳбат тахминан икки соат давом этган. «Улар мамлакат ва дунё олдида турган муҳим миллий хавфсизлик ва ички сиёсат масалаларини муҳокама қилишди», деди у матбуотга.

Жо Байден: Украинани қўллаб-қувватлаш АҚШ миллий манфаатларига тўғри келади

Ўз навбатида, президентнинг миллий хавфсизлик бўйича маслаҳатчиси Жейк Салливан айтишича, Байден Трамп билан суҳбатда Украинани Россия Федерациясига қарши мудофаа урушида кейинги қўллаб-қувватлаш АҚШнинг миллий манфаатларига жавоб беришини таъкидлаган. Трампнинг ўзи The New York Post (NYP) журналисти саволига жавоб берар экан, суҳбатнинг муҳим қисми Яқин Шарқдаги ҳарбий можарога бағишланганини айтди. «Мен унинг (Байден) вазиятга қандай баҳо беришини ва бу ҳақда қандай фикрда эканлигини билмоқчи эдим, - дея унинг сўзларини келтирди газета. - Ва у менга буни берди, у жуда очиқ эди».

Reuters: Украина Россия билан музокараларни бошлашга тайёрланмоқда

Доналд Трампнинг АҚШ президентлиги сайловидаги ғалабаси фонида Украина раҳбарияти Россия билан бўлажак тинчлик музокараларида ўзининг бошланғич позициясини мустаҳкамлаш учун қўшимча қурол-яроғ етказиб бериш ва жанг майдонидаги позицияларини сақлаб қолишга интилмоқда, деб хабар берди Reuters 11 ноябр куни. Трамп ҳокимиятга келса, Россиянинг Украинага қарши урушини «24 соат ичида» тугатишга ваъда берди.

Келгуси тўрт-беш ой урушда ҳал қилувчи бўлади, деди Reuters агентлигига исмини ошкор қилмаслик шарти билан украиналик юқори мартабали амалдор. «Бу қиш жуда муҳим вақт... Умид қиламанки, уруш ниҳоясига етяпти, энди биз музокараларда ҳар икки томоннинг позициясини аниқлаймиз», — дея суҳбатдошидан иқтибос келтиради агентлик.

Расмийнинг сўзларига кўра, Киев энди Трамп янги маъмуриятининг Украинага нисбатан қандай сиёсат олиб бориш ниятида эканлигини тушуниш учун асосий лавозимларга тайинловларни кутмоқда. Reuters суҳбатдошининг тан олишича, АҚШ янги президенти лавозимга киришганидан кейин Киевга ёрдамни қисқартириши хавфи бор. «Умид қиламанки, Байден маъмурияти ёрдам кўрсатишни тезлаштириш орқали бу хавфдан қочишга ҳаракат қилади», деди у.