ГФР СТГ терминаллари операторига РФдан газ қабул қилишни тақиқлади

Германия Иқтисодиёт ва иқлимни муҳофаза қилиш вазирлиги суюлтирилган табиий газ (СТГ) терминаллари давлат оператори Deutsche Energy Terminal (DET)га Россия хомашёсини «умуман қабул қилмаслик»ни буюрди. Бу ҳақда 14 ноябр, пайшанба куни вазирликнинг 6 ноябрдаги хатига таяниб, Financial Times нашри хабар берди.

FT маълумотларига кўра, мактуб мамлакатдаги тўртта СТГ терминалини бошқарадиган DET'га, компания ҳукуматни Брунсбюттеле шаҳрида Россия СТГ юки ҳақида хабардор қилганидан кейин юборилган. Вазирлик DET'га «муҳим давлат манфаатлари» йўлида «кейинги огоҳлантирувга қадар Россиядан СТГ олишдан бош тортишни» буюрди.

Таъкидланишича, агар бундай юклар қабул қилинса, Германия ва бутун Европа Иттифоқи учун «Россия газидан мустақилликни» таъминлаш мақсадида яратилган терминалларнинг «бутун маъноси» йўқолади.

Германия Россиядан келадиган қувур газидан воз кечди

Илгари Россия газининг дунёдаги энг йирик харидори бўлган Германия, Россия Федерацияси 2022 йилда Украинага кенг кўламли бостириб киришни бошлаганидан сўнг, уни тўғридан тўғри импорт қилишни тўхтатди. Қувур орқали газ етказиб беришнинг қисқаришига жавобан, канцлер Олаф Шолц ҳукумати денгиз орқали муқобил таъминот учун бир нечта СТГ терминалларини қурди.

«Германия Россия газини принципиал жиҳатдан импорт қилмайди ва Иқтисодиёт вазирлиги ҳам бу Германиянинг СТГ терминаллари орқали содир бўлмаслиги кераклигини тушунади», деди вазирлик вакили Reuters'га.