Канададаги йирик янгиликлар агентликлари OpenAI’ни судга берди

Канададаги йирик янгиликлар агентликлари коалицияси ChatGPT чатботини яратган OpenAI компаниясини судга берди. Улар АҚШ компаниясини ўз дастурий таъминотини такомиллаштиришда нашрларнинг материалларидан ноқонуний фойдаланиб келганликда айбламоқда.

Даъвогарлар қаторидан Toronto Star, Metroland Media, Postmedia, The Globe and Mail, The Canadian Press ва CBC каби ташкилотлар ўрин олган. Таъкидланишича, мамлакатда бу турдаги даъво шу вақтгача судга киритилмаган.

«Журналистика жамоатчилик манфаатларига жавоб беради. OpenAI бошқалар журналистикасидан ўзининг тижорат мақсадларида фойдаланиши керак эмас. Бу ноқонуний», — дейилади медиаташкилотларнинг қўшма баёнотида.

OpenAI эса ўз моделлари «оммага очиқ маълумотлар орқали ўрганишини» маълум қилди. Компания BBC’га берган изоҳида таъкидланишича, дастурий таъминот «муаллифлар учун адолатли ва инновацияларни қўллаб-қувватлайдиган тегишли халқаро муаллифлик ҳуқуқи тамойилларига асосланган».

«Биз электрон нашрлар билан доимий ҳамкорлик қилиб келамиз, хусусан, ChatGPT қидирув тизими орқали уларнинг муаллифлари ва ҳаволаларини кўрсатамиз», — дейилади изоҳда. Шунингдек, компания ҳамкорлик қилишни хоҳламайдиган нашрлар бемалол рад жавобини беришлари мумкинлигини билдирган.

Канада медиакомпаниялари 84 варақлик аризасида OpenAI’ни контентдан рухсатсиз нусха кўчиришнинг олдини олишга хизмат қиладиган пулли обуна ёки муаллифлик ҳуқуқларидан воз кечиш каби хавфсизлик чораларини эътиборсиз қолдирганликда айбламоқда.

Канаданинг етакчи нашрларидан иборат гуруҳ ChatGPT’ни такомиллаштиришдп фойдаланилган ҳар бир мақола учун 14,3 минг доллар талаб қилмоқда. Бу умумий ҳисобда миллиардлаб долларлик компенсацияга айланиб кетиши мумкин.

Янгиликлар ташкилотлари, шунингдек, OpenAI’дан фойдаланилган мақолаларидан келадиган даромад билан бўлишишни талаб қилмоқда.