Нидерландия билан ўйин ишонч берди: Ўзбекистон ЖЧга тайёр экан!

Бугундан футбол мавзусига кўпроқ тўхталамиз, жаҳон чемпионати бошланмоқда ахир. Мундиал кундалиги рукнида асосан Ўзбекистон миллий жамоасининг ЖЧдаги иштирокига эътибор қаратамиз. Биринчи сонимизда жамоамизнинг энг охирги тайёргарлик доирасидаги икки ўйинига ва умумий жамоанинг ҳолатига тўхталмоқчиман.

Тўғрисини айтай, Канадага қарши ўйиннинг иккинчи бўлимидан кейин хавотирланиб қолгандим, бироқ Нидерландиядек дунё футболи гиганти билан ўйиндан кейин Каннаваро бошчилик жамоага ишончим ошди. Бу гапни айтиш учу кечаги ўйинни кутиб тургандим – Ўзбекистон жаҳон чемпионатига тайёр экан!

Совуқ душ

Каннаваро Ўзбекистон миллий жамоасини қабул қилиб олгандан кейин бирорта расмий ўйин ўтказилмади. Ўртоқлик ўйинлари билан эса хулоса қилиб бўлмайди. Шу сабаб бу мураббийдан нима кутишни кўпчилик билмайди. У келганидан буён фақат илиқ сўзлар эшитди, танқид бўлмади, чунки танқид қиладиган ҳеч нарса йўқ, гўёки барчаси рисоладагидек кетаётганди. Бироқ Канада билан ўйин бундай эмаслигини кўрсатиб қўйди. Жаҳон чемпионати мезбони жаҳон даражасидаги жамоага қарши ўйин нималигини, жаҳон чемпионатида қанақа рақиблар бўлишини кўрсатиб қўйди. Бу ўйин жамоамиз учун совуқ душ бўлди, барча хатоларимиз, хусусан, катта темпга дош беришда қийналишимиз кўриниб қолди.

Каннаваро «ЖЧда хато қилгандан ўртоқлик ўйинларида хато қилган яхши эканини» айтди. Канадага қарши ёмғирли ҳавода ўтган ўйин биз учун жуда фойдали бўлди. Нидерландия билан ўйин мундиал олдидан энг охирги репитиция бўлди, шу билан Мексикада Колумбияга қарши биринчи тур ўйинида майдонга тушамиз.

Нидерландия жуда кучли ва тўғри танланган рақиб эди, чунки гуруҳда Европанинг яна бир жамоаси Португалия билан ўйнашимиз керак. Қувонарлиси, Каннаваро бошчилик жамоамиз Нидерландиядек гигант жамоа билан жуда яхши ўйин кўрсатди. Айниқса иккинчи бўлим якунида устунлик тўлиқ биз томонда бўлди.

Ҳа, ўйинда ютқаздик, лекин рақиблар иккита голни ҳам пеналтидан урди. Марказий ҳимоячиларимиз икки пеналтига сабабчи бўлди. Биз эса чиройли ҳужумдан кейин гол урдик, ўша пайт устунлик тўлиқ биз томонда эди. Айтганча, Нидерландиянинг иккинчи голини ҳисобламаслик керак эди, менимча. Чунки Гапко зарбадан олдин пауза қилиб олди, бу эса янги футбол қоидаларига зид.

Эътибор беринг, биз Нидерландияга ютқаздик ва рақиб ғалаба голини ўйин тугаганидан кейин белгиланган шубҳали пеналтидан катта эҳтимол қоидага зид тарзда урди. Жисмонан кучли, тезкор Европа грандига қарши ўйинда устунликни қўлга олиб гол ура олишимиз, ўйинни назорат қилишимиз мумкинлигини кўрдик. Бу ўйин шахсан менга яхшигина умид берди, энди Колумбия билан ҳам, Португалия билан ҳам бемалол ўйнай олишимизга ишондим.

Мураббийлар штаби Канада ва Нидерландия билан ўйиндаги хатолардан хулосага чиқаришига шубҳа йўқ. Биринчи ўйингача ўн кун вақт борлиги, бу вақт ичида футболчилар Америка ҳавоси, вақт тафовутига янаям мослашиб олган бўлиши инобатга олинса, мундиалдан яхши натижа кутсак арзийди. Аввали бу биз учун биринчи жаҳон чемпионати, унда гуруҳдан чиқолмасак ҳам, жамоани айблаш адолатдан бўлмайди. Лекин Ван Дейк бошчилик Нидерландия билан тенгма-тенг ўйнай олдикми, демак натижа кутсак ҳам бўлади!

Айтганча, таркибдаги муаммолар ҳақида. Ўнг қанотни ким ёпиши ҳамон ноаниқ: Алижонов тикланиш жараёнида, Каримов бир неча ой футбол ўйнамаган. Бу муаммолар фонида Азиз Турғунбоев қолдириб кетилгани яна муҳокама қилинмоқда. Лекин ҳозир кўп жамоада бор бунақа муаммолар. Жаҳон чемпионатида бир футболчи бошқа футболчининг ўрнини ёпиб ўйнаши янгилик эмас. Энди қолганига қўшимча жароҳатлар бўлмаса, кифоя.

Футболчилар ҳозир фақат тикланиш ва Колумбияга қарши ўйинга энг яхши ҳолатда етиб боришни ўйлаши керак. Таркибдаги муаммони мураббий ўзи ҳал қилади...