Руминияда сайловлар: ҳукмрон социал-демократлар етакчилик қилмоқда

Руминиядаги парламент сайловларида бюллетенларнинг қарийб 90 фоизи қайта ишлангандан сўнг, ғарбпараст PSD деярли 24 фоиз овоз билан рўйхатда биринчи ўринни эгаллади. Аммо хориждаги овоз бериш натижалари ҳамма нарсани ўзгартириши мумкин.

Фото: Bogdan Buda/Inquam/REUTERS

Руминияда 1 декабр, якшанба куни бўлиб ўтган парламент сайловларида сайлов участкалари ёпилганидан сўнг, мамлакатнинг ҳукмрон Социал-демократик партияси (PSD) энг кўп овоз йиғмоқда. Онлайн овозларни ҳисоблаш маълумотларига кўра, бюллетенларнинг қарийб 90 фоизи қайта ишлангандан сўнг, PSD 23,84 фоизни олади. Ундан кейинги ўринда 17,85 фоиз овоз билан ўта ўнг «Руминлар бирлиги учун алянс» (AUR), учинчи ўринда 14,64 фоиз овоз билан ўнг марказчи Миллий-либерал партия жойлашган.

Аввалроқ эълон қилинган экзитполлар натижаларига кўра, PSD 26 фоиз, AUR 19 фоиз овоз олган. Бироқ, барча ўта ўнг партиялар катта муваффақиятга эришди, мутахассислар таъкидлашича, уларнинг умумий натижаси тахминан 30 фоизни ташкил этди. Агар сайловнинг якуний натижалари экзитполлар орқали тасдиқланса, PSD бошчилигидаги ғарбпараст коалиция ҳукуматни шакллантириш учун парламентда етарлича ўринларни қўлга киритиши мумкин. Руминиянинг социал-демократ бош вазири Марчел Чолаку мамлакат «ўзлигини, миллий қадриятларини ва эътиқодини ҳимоя қилган ҳолда» Европа йўлида давом этиши кераклигини айтди.

Бироқ, экзитполлар натижаларига хорижда ишлаётган юз минглаб руминияликларнинг овозлари киритилмаган, улар ўта ўнг гуруҳлар ва марказчи мухолифатни қўллаб-қувватлаши кутилмоқда. Хорижда овоз бериш кеча бошланди ва икки кун давом этади.

Руминияда президентлик сайловларидаги овозлар қайта саналади

Руминия Конституциявий суди Марказий сайлов комиссиясига ўта ўнг россияпараст сиёсатчи Кэлин Жоржеску энг кўп овоз олган президентлик сайловларининг биринчи босқичи натижаларини қайта ҳисоблаш мажбуриятини юклади. Бу ҳақда 28 ноябр куни Руминиянинг Digi24 телеканали хабар берди. Канал суҳбатдошлари таъкидлаганидек, бундай чора фирибгарлик гумонини бартараф этиш учун зарур. Шундай қилиб, овоз беришнинг биринчи босқичи натижаларини расман тасдиқлаш кейинга қолдирилди.

Президентликка икки номзод биринчи тур натижаларини бекор этишни талаб қилмоқда

Шу билан бирга, судга президентликка икки номзоддан биринчи тур натижаларини бекор қилиш тўғрисида аризалар келиб тушди. Суд Кристиан Терхешнинг апелляция аризасини қонунда белгиланган муддатдан кейин берилганлиги сабабли рад этди. Себастян Попеску топширган иккинчи аризани кўриб чиқиш 29 ноябр куни бўлиб ўтиши кутилмоқда.

Попеску Жоржескуни сайловолди ташвиқотини молиялаштириш манбаларини яширганликда ва шу тариқа ўзини «шаффоф мустақил номзод» сифатида кўрсатиб, сайловчиларни чалғитаётганликда айблади. Бундан ташқари, Попеску сўзларига кўра, Жоржескунинг TikTok платформасидаги сайловолди видеоларининг «вируслилик» кўламига фақат блогерлар ва рекламалар ёрдами билан эришиб бўлмайди. «Гап офиси Хитойда жойлашган TikTok'нинг тўғридан тўғри қўллаб-қувватлови ҳақида кетяпти», деди Попеску.

#Руминия #сайлов