ФТБ раҳбари Рэй Трамп инаугурациясигача ўз лавозимини тарк этади

АҚШ Федерал терговлар бюроси (ФТБ) директори Кристофер Рэй АҚШ президенти Жо Байденнинг ваколат муддати тугагач, истеъфога чиқиш ниятида. Бу ҳақда 11 декабр, чоршанба куни Вашингтонда АҚШ Адлия вазирлиги маълум қилди.

Бош прокурор Меррик Гарленд Рэй АҚШнинг ҳар икки президенти даврида «ўз мамлакатига ҳалоллик ва маҳорат билан хизмат қилди» деди ва у ФТБ директори лавозимида ишлаганида «ФТБ мустақиллигини жиноий терговларни олиб боришда номақбул таъсирлардан ҳимоя қилиш» учун масъул бўлганини таъкидлади. Бу мустақиллик, деди Гарленд, «қонун устуворлигини таъминлашда марказий ўрин тутади».

Қўшма Штатлар қонунларига кўра, ФТБ директори агентликни сиёсий таъсирдан ҳимоя қилиш учун ўн йил давомида ўз лавозимини эгаллаши керак.

ФТБ янги директори - Трампнинг ўта ўнг тарафдори

АҚШнинг сайланган президенти Доналд Трамп бу қарорни олқишлади ва Кристофер Рэйнинг ваколат муддати тугашига ҳали уч йил қолганини инобатга олиб, унинг қадамини «сахийлик» деб атади. Бироқ у аллақачон Миллий разведка директорининг собиқ маслаҳатчиси ва Трампнинг биринчи муддатида мудофаа вазири штаб бошлиғи бўлган 44 ёшли Кэш Пателни ФТБнинг янги раҳбари этиб тайинлаш нияти тўғрисида маълум қилган.

Пател аввалроқ ФТБни разведка функцияларидан маҳрум этиш ва унинг сафини Трампнинг кун тартибини қўллаб-қувватлашдан бош тортган барча ходимлардан тозалаш тарафдори эди. У 2021 йил январида Капитолийга бостириб киришга оид тергов доирасида сўроқ қилинган. Бундан ташқари, Кэш Пател ўта ўнг «чуқур давлат» фитна назарияси тарафдори бўлиб, бу ҳукумат амалдорлари Трампнинг биринчи муддатида унинг режаларига қарши сиёсий мақсадларда ҳаракат қилганини назарда тутади, дея таъкидлайди AFP. Пателнинг сўзларига кўра, Рэй «Америка муваффақияти ва келажаги бўйича саботаж уюштириш» учун «ҳамма нарсани қилган».