Самарқанддаги газ заправкада ёнғин содир бўлди

Самарқанд вилояти Паст Дарғом туманида автомобилларга суюлтирилган ва сиқилган газ қуйиш шохобчасида ёнғин содир бўлган. Бу ҳақда вилоят Фавқулодда вазиятлар бошқармаси ахборот хизмати хабар бермоқда.

Маълум қилинишича, 2024 йил 11 декабр куни соат 21:00 да Паст Дарғом тумани Гўзалкент қўрғонида жойлашган автомобилларга суюлтирилган ва сиқилган газ қуйиш шохобчасида ёнғин содир бўлаётгани тўғрисида туман ФВБга хабар берилган.

Шунга кўра, 5 та ёнғин-қутқарув экипажлари жалб қилиниб, улар воқеа жойига соат 21:27 да етиб бориб, ёнғин соат 21:50 да тўлиқ бартараф этилган.

Аниқланишича, шохобчада суюлтирилган газ (пропан) ёқилғисини сиғимга тўкиб олиш жараёнида технологик жараёнлар бузилган ва винтелда газнинг локал ёниши содир бўлган.

Ёнғин оқибатида, бино-иншоотларга ва техника воситаларига зарар этмаган. Ҳодисада ҳеч ким жабрланмаган ва ҳалок бўлмаган.

Қайд этилишича, ҳозирда ҳодиса юзасидан терговга қадар текшириш ишлари олиб борилмоқда.