АҚШ Россияни Суданда фуқаролар урушини кескинлаштиришда айблади

Россия Судандаги фуқаролар урушининг ҳар икки томонини қўллаб-қувватлаяпти. Бу ҳақда 6 январ, душанба куни АҚШнинг БМТдаги доимий вакили Линда Томас-Гринфилд маълум қилди, деб ёзади Reuters.

АҚШнинг Россияга қарши айбловлари

2024 йилнинг ноябрида Россия БМТ Хавфсизлик кенгашининг Суданда жанг қилаётган томонларни ўт очишни тўхтатиш ва гуманитар ёрдам етказилишини таъминлашга чақирувчи резолюциясига вето қўйди. Ўшанда БМТ Хавфсизлик кенгашининг қолган 14 та давлати ҳужжатни қўллаб-қувватлади.

«Россия тўсқинлик қилишни танлади: ёлғиз туриб, тинч аҳолини хавф остига қўйиш учун овоз берди, шу билан бирга, можаронинг ҳар икки томонини ҳам молиялаштиряпти — ҳа, мен шундай дедим: ҳар икки томонни», — деди Томас-Гринфилд. Reuters таъкидлаганидек, у Россия Федерацияси буни қандай ва нима учун қилаётгани ҳақида батафсил маълумот бермади.

Кейинроқ АҚШнинг Бирлашган Миллатлар Ташкилотидаги миссияси Вашингтон Россиянинг «Судандаги олтин савдосидан доимий манфаатдорлигидан» хабардор эканини айтди ва уришаётган томонларга «ноқонуний олтин савдоси ёки ҳарбий техника етказиб бериш орқали» ҳар қандай моддий ёрдам тақдим этилишини қоралади.

«Биз Суданнинг олтин қазиб олиш бўйича Россиянинг санкция остидаги юридик шахслари ва жисмоний шахслари билан ҳамкорлиги Суданнинг узоқ муддатли манфаатларига ва Судан халқининг урушни тугатишга бўлган интилишларига зарар етказиши мумкинлигига ишонамиз», — деди АҚШнинг жаҳон ташкилотидаги миссияси вакили.

Судан Россия ҳарбий-денгиз базасини жойлаштиришдан бош тортди

Россия ўз ҳарбий-денгиз базасини Қизил денгиз соҳилида Суданда жойлаштириш уринишларидан воз кечмаяпти, бироқ бу мақсадга ҳали эриша олмади. Бу ҳақда 18 декабр куни The Moscow Times (МТ) ёзмоқда. Унинг Судан разведкаси ходимига таяниб ёзишича, Россия Федерацияси ҳарбий-денгиз базасини қуриш бўйича келишувга эришиш учун маҳаллий ҳокимиятга замонавий С-400 зенит-ракета мажмуаси (ЗРМ)ни таклиф қилган. Бироқ, бу таклиф Судан томонидан АҚШ ва бошқа Ғарб давлатларининг салбий муносабатига сабаб бўлишидан қўрқиб, рад этилди. Судан разведкачисининг сўзларини америкалик икки амалдор ҳам тасдиқлади, дея аниқлик киритади МТ.

Янги ҳарбий-денгиз базасини қўлга киритиш Россия учун Суриядаги сўнгги воқеалар нуқтайи назаридан муҳим аҳамият касб этмоқда, у ерда ҳукмдор Башар Асаднинг ағдарилиши туфайли у бундай базадан маҳрум бўлиши мумкин. Шу билан бирга, фуқаролар уруши олиб борилаётган, ҳукумати Кремл томонидан қўллаб-қувватланадиган Судан (яқингача Сурияда бўлгани каби) ҳали Москва истакларини қондиргани йўқ. Бироқ, МТ қайд этишича, мамлакатлар ўртасида Россия қуроллари ва нефт маҳсулотларини сотиб олиш бўйича келишув тузилган. Хусусан, етти ойлик танаффусдан сўнг ёнилғи етказиб бериш қайта тикланди: апрелдан октябргача Россия Суданга 2,8 миллион баррел дизел ва бензин экспорт қилди, бу Судан импортининг деярли ярмини ташкил этади.