Немис фирмаси Россияга қурол етказиб берганини рад этди

Германия қурол тарқатувчиси Hans Wrage & Co. GmbH ўзи етказиб берган қуроллар учинчи давлатлар орқали Россияга етиб келаётгани ҳақидаги маълумотни рад этди. Компания 14 январ, сешанба куни DW'га эксклюзив изоҳ юборди.

Декабр ойида бир гуруҳ халқаро оммавий ахборот воситалари Россия қандай қилиб санкцияларни четлаб ўтиб, собиқ СССР давлатлари орқали Европа Иттифоқи ва АҚШдан снайпер милтиқлари ва ўқ-дориларини олишда давом этаётгани ҳақидаги суриштирувни чоп этди. Материал The Insider (Россия), Investigace (Чехия), IrpiMedia (Италия) ва "Власть" (Қозоғистон) журналистлари томонидан тайёрланган. Матнда турли Ғарб компаниялари, масалан, Люксембургдаги Beretta ҳолдинги, шунингдек, Россия Федерациясига қурол-яроғлар кириб келаётган собиқ СССРнинг бир қанча давлатлари санаб ўтилган.

Hans Wrage & Co'га қарши айбловлар

Суриштирув шуни кўрсатдики, Германия қурол ишлаб чиқарувчилари орасида Ҳамбургдаги Hans Wrage & Co фирмаси Россия Федерацияси билан алоқаларни сақлаб туради. Унинг раҳбари Фрауке Лёман Россиянинг "Русимпэкс" қурол компаниясининг 15,96 фоиз акцияларига эгалик қилади, деб хабар берди ОАВ. Улар Украинадаги урушга қарамай, "Русимпэкс" Россия Федерациясига Miroku япон карабинларини, Германиянинг Anschütz, Krieghoff ов милтиқларини, Ruag Ammotec ва RWS патронларини, шу жумладан, ҳарбий калибрдагиларни импорт қилишни давом эттираётганини ёзди.

Оммавий ахборот воситаларининг таъкидлашича, Hans Wrage'нинг ўзи Россия Федерациясига тўғридан тўғри қурол ва ўқ-дориларни сотишдан бош тортган, аммо пневматик ўқлар, қурол қутилари, ов кийими ва пойабзалларини етказиб беришда давом этмоқда. Бундан ташқари, 2022-2023 йилларда Hans Wrage Қозоғистонга камида 309 та Италиянинг Benelli ов милтиғи ва 176 та Германиянинг Blaser карабинларини етказиб берган. The Insider ёзганидек, уларнинг баъзилари ўша ердан Россияга юборилган.