Нетаняҳу ҲАМАСни сулҳ келишувини бузишда айблади

Исроил ҳозирга қадар ҲАМАСдан ўт очишни тўхтатиш тўғрисидаги келишув доирасида озод этиладиган гаровдагилар рўйхатини олгани йўқ. Бу ҳақда мамлакат бош вазири Бинямин Нетаняҳу маълум қилди.

«Биз келишилганидек, озод этилиши керак бўлган гаровдаги шахсларнинг рўйхатини қўлга киритмас эканмиз, режа бўйича олдинга силжимаймиз. Исроил келишувнинг бузилишига тоқат қилмайди. Барча масъулият ҲАМАС зиммасида», — дейди ҳукумат раҳбари.

Келишувга кўра, ҲАМАС озод этиладиган гаровдаги шахслар рўйхатини 19 январ маҳаллий вақт билан соат 16:00 га режалаштирилган алмашувдан камида 24 соат олдин тақдим этиши керак эди. Аввалроқ Исроил ва ҲАМАС ўртасидаги ўт очишни тўхтатиш режими 19 январ соат 08:30дан кучга кириши айтилганди.

Келишувнинг биринчи босқичида ҲАМАС 33 нафар гаровга олинган шахсни озод этиши керак, Исроил эса қамоқхоналардан салкам 1,9 минг фаластинлик маҳбусни озод этади.

Аввалроқ, Исроил бош вазири Бинямин Нетаняҳу идораси ҲАМАС сўнгги дақиқада Исроил билан келишувдаги баъзи бандлардан воз кечгани ва шу орқали келишувга эришишга тўсқинлик қилганини айтганди. Исроил ҳукуматига кўра, ҲАМАС Ғазо секторида 98 нафар исроилликни гаровда ушлаб турибди.