Германия элчиси: Трамп АҚШда конституциявий тузумни ўзгартириши мумкин

Германиянинг Вашингтондаги элчиси Андреас Михаэлис Германия ҳукуматини АҚШнинг сайланган президенти Доналд Трамп лавозимига киришганидан кейин АҚШ сиёсатида юз бериши мумкин бўлган катта ўзгаришлар ҳақида огоҳлантирди. Бу ҳақда dpa ва Reuters ахборот агентликлари 19 январ, якшанба куни махфий ҳужжатга таяниб хабар берди.

14 январда Михаэлис имзолаган ва Германия Ташқи ишлар вазирлиги, федерал канцлер идораси, Германия Ички ишлар ва Адлия вазирликларига юборилган ҳужжатда Трампнинг Оқ уйда иккинчи муддатга сайланиш режалари якунида «конституциявий тузумни қайта кўриб чиқишга – Конгресс ва федерал штатлар зарарига президент қўлида ҳокимиятнинг максимал даражада тўпланишига» олиб келадиган «максимал» дастур сифатида тасвирланган. 

«Асосий демократик тамойиллар, назорат ва мувозанат тизими сезиларли даражада бузилади, қонун чиқарувчи ҳокимият, ҳуқуқни муҳофаза қилиш органлари ва оммавий ахборот воситалари ўз мустақиллигини йўқотади ва сиёсий восита сифатида ишлатилади, энг йирик технология компаниялари эса биргаликда бошқарувга эга бўладилар», — деб ёзади дипломат.

Унинг қайд этишича, суд тизими, хусусан, АҚШ Олий суди Трампнинг ўз режаларини амалга ошириш ҳаракатларида марказий ўрин тутади. Михаэлис фикрича, Адлия вазирлиги ва Федерал терговлар бюроси устидан назорат республикачиларнинг оммавий депортациялар, душман деб ҳисобланганлардан қасос олиш ва қонуний иммунитет каби сиёсий ва шахсий мақсадларига эришишнинг калитидир.

Трамп митингда Украинадаги урушни тугатишга ваъда берди

АҚШнинг сайланган президенти Доналд Трамп Украинадаги уруш ва Яқин Шарқдаги тартибсизликни тўхтатишга ва учинчи жаҳон урушининг олдини олишга ваъда берди. Бу ҳақда у 19 январ куни кечқурун ўзининг инаугурацияси арафасида Вашингтонда ўтказилган митингда маълум қилди.

«Америка халқи бизга ишонди ва бунинг эвазига биз уларга Америка тарихида президентлик давридаги энг яхши биринчи кунни, энг ажойиб биринчи ҳафтани ва энг муваффақиятли биринчи 100 кунни берамиз», деди Доналд Трамп тарафдорларига АҚШ пойтахтида. Reuters агентлигининг хабар беришича, сиёсатчи президентлик фаолиятининг дастлабки соатларидаёқ юзга яқин ижро фармойишларини имзоламоқчи.

Трамп ўзининг биринчи ташаббуслари АҚШ чегара хавфсизлигини таъминлаш, ноқонуний муҳожирларни оммавий депортация қилиш, хилма-хиллик ташаббусларини чеклаш, 2021 йил 6 январда Капитолийда бўлиб ўтган намойиш иштирокчиларини афв этиш, табиий ресурслар қазиб олишни кўпайтириш, давлат хизматчиларининг оммавий алмашинуви ва бошқа сиёсий масалаларга тегишли эканлигини эълон қилди. 

Сайланган президент ўз нутқида Жо Байден маъмуриятининг «ҳар бир радикал ва аҳмоқона фармонини» лавозимга киришганидан кейин бир неча соат ичида бекор қилишга ваъда берди. Бундан ташқари, у 20 январ оқшомига қадар АҚШда ноқонуний тўдаларга қарши курашни бошлаш ва мамлакатда «Темир гумбаз» ракетага қарши мудофаа тизимини яратиш ниятида эканлигини маълум қилди.

Трамп, шунингдек, ижтимоий тармоқни Хитойдан ташқаридаги шахсга сотишни талаб қилувчи қонун кучга киргани туфайли бир кун аввал америкалик фойдаланувчилар вақтинча фойдалана олмаган TikTok иловаси мавзусини ҳам эътибордан четда қолдирмади.