Эрон ядровий ихтироларини космик дастур номи остида яшириб келмоқда — ОАВ

Эрон Мудофаа вазирлигининг ядровий ривожланишга масъул ҳисобланган Махфий агентлиги мамлакат космик дастури объектларида фаолият юритади. Бу ҳақда Париждаги Эрон миллий қаршилик кенгаши ҳисоботига таяниб Fox News телеканали хабар берди.

«Бир неча ой давомида тўпланган маълумотлар Эрон мудофаа инновациялари ва тадқиқот ташкилоти Шоҳруд ва Семнандаги объектларида ядровий жанговар каллакларни яратиш устидаги ишларни фаоллаштирганини кўрсатди», — дейилади ҳисоботда. Таъкидланишича, ушбу объектлар авваллари фақат космик ихтиролар билан шуғулланади дея ҳисоблаб келинган.

Ҳисоботда, шунингдек, 2024 йил сентябрда Теҳрон Chamran-1 разведка сунъий йўлдошини учиришда фойдаланган Qaem-100 ташувчи ракетаси ҳам тилга олинган. Маълумотларга кўра, у ядровий каллакни ҳам ташишга қодир.

Семнан космодромидаги иккинчи объектда Simorgh типидаги суюқ ёнилғида ишловчи двигателга эга ракеталарни яратиш ишлари олиб борилади — у оғир сунъий йўлдошларни орбитага олиб чиқишга қодир. Аммо ташкилотнинг ҳисоблашича, улардан ядровий зарядларни етказишда ҳам фойдаланиш мумкин.

Axios’нинг қайд этишича, Жо Байден президентлиги даврида Эроннинг ядровий дастури «сезиларли даражада олдинга силжиган». 2023 йил декабр охирларида МАГАТЭ Эрон 60 фоизгача бойитилган уран ишлаб чиқариш суръатини оширганини маълум қилганди (ядровий қурол учун 90 фоизгача бойитилган уран керак бўлади). 2024 йил баҳорда Байден администрацияси ядровий тадқиқотлардан «жиддий хавотири» бўйича огоҳлантириш юборган. Шу билан бирга Эрон ядровий қурол яратмоқчи эканини рад этиб келади.