Илон Маск АҚШ Молия вазирлиги тўлов тизимларини текшириш ҳуқуқига эга бўлди

Маск раҳбарлик қилаётган Ҳукумат сарамадорлиги департаменти федерал тўлов тизимларидан фойдаланиш рухсатини қўлга киритди. Ўз навбатида улар Молия вазирлиги фирибгарлар ва террористик гуруҳларнинг тўловларига рухсат бериб келганини аниқлади.

Фото: Reuters

АҚШ Молия вазирлиги фирибгарлар ва террорчилик гуруҳларининг тўловларига рухсат бериб келган. Бу ҳақда бизнесмен Илон Маск ўзи раҳбарлик қилаётган Ҳукумат самарадорлиги департаменти (DOGE) томонидан олиб борилган ўрганиш ишлари натижасига таяниб маълум қилди.

«DOGE жамоаси Молия вазирлигида тўловларни тасдиқлайдиган мансабдор шахсларга ҳатто таниқли фирибгар ёки террористик гуруҳлар бўлса ҳам уларнинг тўловларини доим тасдиқлаш тўғрисида кўрсатма берилганини аниқлади. Улар ўзларининг бутун карераси давомида рад жавобини бермаган. Бирор марта», — дейди Маск.

Шу билан бирга у қандай гуруҳлар ҳақида гап кетаётганига ойдинлик киритмаган.

Аввалроқ The New York Times ўз манбаларига таяниб, Молия вазирлиги раҳбари Скотт Бессент DOGE’нинг бир нечта вакилига давлат харажатларини назорат қилиш ва чеклаш учун федерал тўлов тизимларидан фойдаланишга рухсат бергани ҳақида ёзганди. Газета маълумотларига кўра, 2023 йилда ушбу тизим орқали 5 триллион долларлик тўловларга оид маълумотлар қайта ишланган.

Маск жамоаси тизимдан фойдаланиш рухсатини олганидан кейин бирор тўловни блоклаб қўйгани тўғрисида ҳозирча ҳеч нарса маълум эмас. Орегон штатидан сайланган демократ сенатор Рон Уайден бизнесменнинг тизимдан фойдалана олиши манфаатлар тўқнашувига олиб келиши мумкинлигидан огоҳлантирган.

DOGE’ни Маск билан бирга бизнесмен Вивен Рамасвами бошқариши керак эди, аммо у лавозимдан воч кечган. The Washington Post’га кўра, тадбиркорлар ўртасида келишмовчилик юз берган.