Шовотда профилактика инспектори эри Россияда бўлган аёлнинг уйида ушланди

Хоразм вилояти Шовот туманидаги Идалиқалъа маҳалласи профилактика инспектори ўзи хизмат олиб борадиган ҳудудда яшовчи бегона аёл билан “қўлга тушди”. Бу ҳақда Kun.uz манбаси хабар берди.

Маълум бўлишича, профилактика инспектори (ходимнинг исми таҳририятга маълум) ушбу маҳаллада яшовчи, ишлаб пул топиш учун Россияга кетган эркакнинг турмуш ўртоғи билан унинг хонадонида “дон олишиб” юрган. У жорий йил 31 январ куни ярим тунда навбатдаги “ташрифи” чоғида эрнинг яқин қариндошлари томонидан ушлаб олинган.

Kun.uz’га келиб тушган видеолавҳада кўринишича, профилактика инспектори юзини яширган ҳолда хонадондан чиқиб кетишга уринган. Аммо эркакнинг укаси томонидан тўхтатиб қолинган.

“Мен сенинг ортингдан узоқ кузатдим. Бир келиб кетдинг, индамадим, икки келиб кетдинг, ичимга ютдим. Бунинг эри 1 сўм топса, 2 сўм қилиб юборай дея Россияда ишлаб юрибди. Сенинг ўз оиланг йўқми? Нима қилганинг бу?” деган аёлнинг қайнукаси ходимга қараб.

Воқеа жойига бошқа ёши катта қариндошлар, туман ИИБ масъуллари чақирилган. Чақирув бўйича келган ИИБ масъуллари ҳолатга ойдинлик киритиш мақсадида профилактика инспектори ҳамда гувоҳларни ИИБ биносига олиб кетган.

Ички ишлар вазирлиги матбуот котиби Шохруҳ Ғиёсов ушбу ҳолат бўлганини Kun.uz’га тасдиқлади. Унинг билдиришича, ҳозирда хизмат текшируви ўтказиляпти ҳамда профилактика инспекторини ички ишлар органи ходими шаънига путур етказувчи ҳаракатлари учун ИИО сафидан бўшатиш масаласи кўриб чиқилмоқда.