Шимолий Македониядаги тунги клубда юз берган ёнғин оқибатида камида 50 киши ҳалок бўлди

Шимолий Македониядаги Кочани шаҳрида жойлашган дискотекада юз берган ёнғин оқибатида камида 50 киши ҳалок бўлди. Бу ҳақда мамлакат ИИВдаги манбаларига таяниб, MIA агентлиги хабар берди.

Ички ишлар вазирлиги ҳозирча расмий баёнот бермаган, аммо ўнлаб жабрланувчилар шаҳарнинг турли шифохоналарига етказилганини тасдиқлаган.

Қайд этилишича, фожиа юз берган вақтда бинода 1,5 мингга яқин одам бўлган. Ёнғин маҳаллий вақт билан соат 03:00 ларда бошланган. Тахминларга кўра, ёнғин DNK гуруҳининг концерти вақтида пиротехника воситасидан фойдаланилгани сабаб келиб чиққан.

Ҳодиса жойига бош вазир Христиан Митскоски ва ҳукумат аъзолари етиб келган. Қутқарув хизматлари маҳаллий аҳоли билан бирга ёнғин оқибатларини бартараф этмоқда.

Маҳаллий «Вечер» нашрининг маълумотларига кўра, концерт ўтказилган тунги клуб эгаси қўлга олинган. Шунингдек, ИИВ тадбир ташкилотчиларини ҳам сўроққа чақирган.