Тошкентдаги ноқонуний қурилиш майдонида эркак зинадан йиқилиб вафот этди

Тошкент шаҳридаги ноқонуний қурилишлардан бирида одам ўлими рўй берди. Воқеа Яккасарой туманида, 17 феврал куни рўй берган.

Бош прокуратура маълумотига кўра, 1974 йилда туғилган эркак Аския кўчасида жойлашган кўп қаватли уй қурилиш ишлари олиб борилаётган бинога кираётган вақтида, зинапоядан тойиб кетиб бино ертўласига тушиб кетган ва воқеа жойида вафот этган.

Ҳолат бўйича терговга қадар текширув ҳаракатлари олиб борилмоқда.

Ижтимоий тармоқларда воқеа Askiya city турар жой мажмуасида рўй бергани ҳақида хабарлар тарқалди.

Қурилиш инспекциясининг маълум қилишича, 2020 йил май ойида Askiya city'да олиб борилаётган қурилиш ишлари Вазирлар Маҳкамасининг тегишли қарорига зидлиги аниқланган. Яъни ишлар қурилиш инспекциясини хабардор қилмаган ҳолда ва белгиланган тартибда рўйхатдан ўтмаган тарзда бошланган.

“2020 йил 27 майда инспекция томонидан қурилиш ишларини тўхтатиш бўйича ёзма кўрсатма берилган. Маъмурий жавобгарликка тортилган ҳамда қурилиш-монтаж ишлари тўхтатилган.

Лекин 2024 йил 26 апрел куни олиб борилган қайта текширув жараёнида ишлар давом этаётгани аниқланган ва қурилиш масъуллари чақиртирилган. Аммо улар қурилиш объектига келмаган ва талаб қилинган ҳужжатлар тақдим этилмаган.

Шу сабабли мазкур ҳолат юзасидан маҳалла профилактика инспектори иштирокида далолатнома расмийлаштирилган ҳамда тегишли текширув ишлари якунланган. Ҳолатга ҳуқуқий баҳо бериш учун тегишли ҳуқуқ-тартибот органларига даъво аризалари киритилган.

Бугунги кунда Тошкент шаҳар ИИББ ҳузуридаги тергов бошқармаси томонидан ушбу объект бўйича жиноят иши очилган. Шунингдек, объектда барча турдаги қурилиш ва монтаж ишлари тўхтатилган”, – дейилади хабарда.