Британия Россияга қарши энг катта санкциялар пакетини жорий этади

Янги санкциялар пакети 24 феврал куни — Украинага қарши бошланган урушга уч йил тўлиши муносабати билан эълон қилинади.

Дэвид Лэмми Фото: Matthias Schrader / AP

Буюк Британия ташқи ишлар вазири Дэвид Лэмми 24 феврал куни Лондон Россияга нисбатан энг йирик санкциялар пакетини эълон қилишини айтди. Унинг қўшимча қилишича, Украина ва Европа «критик вазиятда» турибди.

«Эртага мен Россияга қарши можаро бошланганидан бери жорий этиладиган энг катта санкциялар пакетини эълон қиламан», — дейди Лэмми. Унинг сўзларига кўра, ҳозир «талабни кучайтиришнинг айни вақти».

Буюк Британия ТИВ раҳбари, шунингдек, «барқарор, адолатли тинчликка» эришиш учун АҚШ ва Европа Иттифоқи билан ҳамкорлик қилиш ниятини билдирди. Феврал бошларида Британия бош вазири канцелярияси Кир Стармер Россия энергетика компанияларига қарши санкцияларни муҳокама қилиши ҳақида маълумот берганди.

24 феврал куни — Украинага қарши жанговар ҳаракатлар бошланганига уч йил тўлиши муносабати билан Европа Иттифоқи санкцияларнинг 16-пакетини жорий этади. Бу сафар бошқа нарсалар қаторида алюминий ва нефт экспортига ҳам чекловлар қўлланади.

Аввалроқ Европа давлатлари Украинага камида 20 миллиард евролик ҳарбий ёрдам пакети устида ишлаётгани тўғрисида хабар берилганди. Европа Иттифоқи шу тариқа АҚШнинг Россия билан яқинлашуви фонида Киевни қўллаб-қувватлашга ҳаракат қилмоқда. Пакетга, хусусан, артиллерия снарядлари, ҳаво ҳужумидан мудофаа тизимлари, ракеталар киради.