Германияда муддатидан олдин парламент сайловлари бошланди

Овоз бериш жараёнлари маҳаллий вақт билан соат 18:00 га қадар давом этади. Шундан кейин дарҳол экзит-поллар натижаси пайдо бўлиши кутилмоқда.

Фото: dpa

Германияда бундестаг (парламент) сайловлари учун барча овоз бериш участкалари очилди, деб хабар беради Associated Press.

Қайд этилишича, овоз бериш жараёнлари маҳаллий вақт билан соат 18:00 га қадар давом этади. Шундан кейин дарҳол экзит-поллар натижаси пайдо бўлиши кутилмоқда. Германия фуқаролари, шунингдек, почта орқали ҳам овоз беришлари мумкин бўлади.

Агентликнинг таъкидлашича, Европанинг АҚШ президенти Доналд Трамп маъмуриятини Украина инқирози, қитъада хавфсизликни таъминлаш муаммоларига нисбатан сиёсатига жавоби ушбу сайловлар натижасига боғлиқ.

Германия сайлов тизимига кўра, камдан кам ҳолларда бирор-бир партия мутлақ устунлик билан ғалабага эришади; афтидан, келаётган ҳафтада икки ёки ундан ортиқ партия ҳукмрон коалицияни шакллантиради. Жамоатчилик ўртасида ўтказилган сўровлар ҳам шу каби натижани кўрсатган — бирор-бир партия фуқаролар орасида алоҳида машҳурликка эга эмас.

Жамоатчилик фикрини ўрганиш мақсадида ўтказилган сўровларда Фридрих Мертснинг Христиан-демократик иттифоқ ва Христиан-социал иттифоқ консерватив блоки етакчилик қилган, ундан кейинги ўринлари Алиса Вайделнинг «Германия учун муқобил» ҳамда канцлер Олаф Шолтс аъзоси бўлган Германия социал-демократлар партияси эгаллаган.

Эслатиб ўтамиз, ўтган йилнинг декабр охирларида Германия президенти Франк-Валтер Штайнмайер мамлакат парламентини (бундестаг) тарқатиб юбориб, 2025 йил 23 феврал куни муддатидан олдин парламент сайловлари ўтказилишини белгилаганди. «Ҳозиргидек мураккаб даврда барқарорликни таъминлаш учун салоҳиятли ҳукумат ва парламентда ишончли кўпчилик талаб этилади», — деганди у.

#Германия #бундестаг #сайловлар