Ҳамас Исроилга гаровга олинган 4 кишининг жасадини топширди

Ҳамас ҳаракати 2023 йил 7 октябрда Исроилга уюштирилган йирик ҳужум пайтида жангчилар томонидан гаровга олинган тўрт нафар исроилликнинг жасадини Қизил Хочга топширди. Бу ҳақда 27 феврал, пайшанбага ўтар кечаси Исроил хавфсизлик хизматларига таяниб, AP агентлиги хабар берди.

Таъкидланишича, жасадлар бўлган тобутлар "Керем-Шалом" назорат пунктида Исроил Мудофаа кучлари (ЦАҲАЛ)га топширилиши керак. Исроил топширилган жасадлар келишувда тилга олинган гаровга олинганларники эканлигига ишонч ҳосил қилиш учун чегара яқинида шахсни аниқлаш жараёнини амалга ошириш ниятида.

The Times of Israel интернет-нашрининг ёзишича, 69 ёшли Нир Оз киббуцасида яшаган Итцик Элгарат, 49 ёшли Цахи Идан, 85 ёшли Шломо Манцур ва яна бир собиқ гаровга олинган шахснинг жасадлари Исроил томонига топширилиши керак. Нашрнинг ёзишича, Манцур террорчилар томонидан гаровга олинган исроилликларнинг энг кексасидир. У ҳужум куни, 2023 йил 7 октябрда ўлдирилган, деб ҳисобланган, кейин унинг жасади Ғазо секторига олиб кетилган.

Айни пайтда, Исроил қамоқхоналаридан озод этилиши керак бўлган фаластинлик маҳбусларни олиб кетаётган автобус Ғарбий Соҳил марказидаги Фаластин шаҳри Рамаллоҳга етиб келди, деб хабар бермоқда AFP. У ерда уларни фаластинликлар кутиб олди.

Фаластинлик маҳбусларни озод қилиш кечиктирилган

25 феврал куни Ҳамас Исроил билан гаровга олинган тўрт кишининг жасадини топшириш бўйича келишиб олганини маълум қилди. Бу маълумотни ўша куниёқ Исроил расмийси ҳам тасдиқлади.

Аввалроқ, 23 феврал куни Исроил бош вазири Бинямин Нетаняҳу Ғазо секторида ўт очишни тўхтатиш келишуви доирасида 22 февралга белгиланган 600 дан ортиқ фаластинлик маҳбусни озод қилиш, Ҳамас гуруҳи исроилликларни гаровга олганларни топшириш чоғида ўтказаётган «таҳқирлаш маросимларини» тўхтатмагунча кечиктирилишини маълум қилганди.

22 феврал куни Ҳамас яна олти нафар исроиллик гаровга олинганларни озод қилди ва ўз томонида келишувнинг биринчи босқичи якунланганини эълон қилди. Исроил шу куни 602 фаластинлик маҳбусни қамоқдан озод қилиши керак эди. Кечқурун Ҳамас уларни озод қилиш кечикаётгани ҳақида хабар бериб, Исроилни ўт очишни тўхтатиш келишувини «қўпол равишда бузганликда» айблади.

2 мартга қадар давом этадиган биринчи босқич доирасида жами 25 нафар исроиллик озод этилиши, саккиз нафарининг жасади топширилиши керак.