ИҲЕС Украинани 2014 йил майида Одессадаги одамлар ўлимида қоралади

Украина ҳукумати 2014 йил май ойи бошида Одессадаги норозилик намойишлари ва тартибсизликлар чоғида ўлим ҳолатларининг олдини ололмаган, дея қарор қилди Инсон ҳуқуқлари бўйича Европа суди (ИҲЕС). Ўт ўчирувчилар, полиция ва Украинанинг бошқа идоралари зўравонликларнинг олдини олиш ёки тўхтатмаслик ҳамда ёниб кетган Касаба уюшмалари уйидаги одамларни қутқариш учун қўлидан келган ишни қилмагани туфайли Инсон ҳуқуқлари ва асосий эркинликларини ҳимоя қилиш бўйича Европа конвенциясини бузган, деб қарор қилди Страсбургдаги суд 13 март, пайшанба куни.

Бундан ташқари, ушбу ҳодисалар юзасидан самарали текширув ташкил этилмаган ва ўтказилмаган, дейилади қарорда. Судялар бир овоздан Украина инсон ҳуқуқлари бўйича Европа конвенциясининг яшаш ҳуқуқини мустаҳкамловчи 2-моддасини бузган, деган хулосага келишди. Бир аризачига нисбатан шахсий ва оилавий ҳаётни ҳурмат қилиш ҳуқуқи тўғрисидаги 8-модда бузилганлиги аниқланди.

Жами жарима деярли 115 минг еврони ташкил этади

Украина даъвогарларга жами 114,7 минг евро тўлаши керак. Жамоавий даъво 28 нафар жабрланувчи ва ҳалок бўлганларнинг яқинлари томонидан қўзғатилган.

2014 йил 2 май куни Одессада юз берган оммавий тартибсизликлар ва ёнғинлар чоғида 48 киши ҳалок бўлган, 200 дан ортиқ киши жароҳатланган эди. Фожиа қурбонларининг аксарияти ёниб кетган Касаба уюшмалари уйида бўлган, унга молотов коктейллари ташланган. Тергов маълумотларига кўра, россияпараст ва европапараст фаоллар ўртасида оммавий тартибсизликлар ва тўқнашувлар аввалдан режалаштирилган ва уюштирилган.