Қарши шаҳри ҳудуди қарийб 2 баробар кенгаяди

Вазирлар Маҳкамасининг «Қарши шаҳрининг бош режасини тасдиқлаш тўғрисида»ги қарори қабул қилинди. Тасдиқланган бош режага кўра, Қашқадарё вилояти маркази 18 йил ичида Косон, Қарши ва Кўкдала туманлари ҳудудига 7 минг 767 гектарга, яъни қарийб 2 баробар кенгаяди.

Қарши шаҳрининг ҳудуди ҳозирги пайтда 8 минг 308,9 гектарни ташкил этади, 2030 йилнинг охирига қадар (биринчи навбатда) 11 минг 26,8 гектар, 2042 йил якунигача (ҳисоб даврида) эса 16 минг 73,6 гектаргача ўзгаради.

Қайд қилинишича, шу йилларда шаҳар аҳолиси сони 300 минг кишидан 470 минг кишигача кўпайиши кутилмоқда, уй-жой фонди эса 3 миллион 992,27 минг квадрат метрдан 10 миллион 810 минг квадрат метргача ошиши режа қилинган. Шунда уй-жой билан таъминланиш даражаси бир кишига ўртача 14,1 квадрат метрдан 2042 йилда 23 квадрат метргача кўтарилади. Эътиборлиси, шаҳар уй-жой фондининг умумий майдонида 2-3 ва 4-5 қаватли уйларнинг ҳиссаси кескин камайиб, 7, 12, 14 ва 16 қаватли уйларнинг ҳиссаси эса, аксинча, ортади, 9 ва 20 қаватли уйлар барпо этилади.

Қарши шаҳрининг бош режасига мувофиқ, аҳолининг ижтимоий соҳа объектларига бўлган талабини амалдаги меъёрларга мослаштириш асносида соҳа кўрсаткичлари жадал суръатларда ўзгаради. Масалан, мактабгача таълим ташкилотларининг қуввати ҳозирги 11,8 минг ўриндан 29 минг 140 ўрингача, умумтаълим мактаблари қуввати эса мос равишда 38 минг ўриндан 74 минг 260 ўрингача ошади. Худди шу тарзда шаҳардаги шифохона ва поликлиникалар, дўконлар ва умумий овқатланиш корхоналари, клублар ва маданият саройлари, театр ва кинотеатрлар, меҳмонхоналар ва маиший хизмат кўрсатиш корхоналарининг ҳам хизмат қамрови кенгаяди.