Зеленский: Украина қуролли кучлари Курск областида операцияни якунлади

Украина Қуролли кучларининг Курск областидаги операцияси «ўз вазифасини бажарди», деди мамлакат президенти Володимир Зеленский 14 март, жума куни Киевда журналистларга. Унга кўра, Украина Қуролли кучларининг Курск ҳужуми натижасида Россия армияси ўз кучларининг бир қисмини Харкив ва Покровск йўналишларидан олиб чиқиб кетган. Натижада у ерда вазият «барқарорлашди» ва Россия Қуролли кучлари энди «Покровскни яна ишғол қилиш имкониятини топиши жуда қийин бўлади», деб ҳисоблайди Зеленский.

Зеленский: Россия урушни давом эттиришга интиляпти

Украина президенти Володимир Зеленский уч йилдан кўпроқ вақт олдин Украинага қарши тажовузкор уруш бошлаган Россияни тинчлик келишувини атайлаб кечиктираётганликда айблади. «Афсуски, бир кундан ортиқ вақтдан бери дунё билдирилган таклифларга нисбатан Россия томонидан мазмунли жавоб эшитмаяпти. Ва бу айнан Россия урушни давом эттиришга интилаётганини ва тинчлик бошланишини имкон қадар кечиктиришга ҳаракат қилишини яна бир бор тасдиқлайди», деб ёзди у Telegramʼда 13 март куни тушдан кейин. У, шунингдек, «АҚШнинг босими Россияни урушни тугатишга мажбур қилиш учун етарли бўлишига» умид билдирди.

Зеленский: Россия ўт очишни тўхтатишдан бош тортса, Украинани мустаҳкамлаш керак бўлади

Украина президенти Володимир Зеленский Россияни АҚШнинг Киев ва Москва ўртасида 30 кунлик ўт очишни тўхтатиш ҳақидаги таклифига жавоб беришга чақирди. «Ҳаммаси Россия ўт очишни тўхтатиш ва тинчланишни хоҳлайдими ёки одамларни ўлдиришда давом этишни хоҳлайдими, бунга боғлиқ», деди у 12 март куни Киевда.

Аввалроқ Украина 30 кунлик оташкесимга рози бўлган, энди эса Москва ўз жавобини бериши керак, деди Зеленский.