Янгийўлда Gentra симёғочга бориб урилди

Тошкент вилояти ИИББ Йўл-ҳаракати хавфсизлиги бошқармаси Янгийўл туманида содир бўлган йўл-транспорт ҳодисаси юзасидан маълумот берди.

Қайд этилишича, 14 март куни соат таҳминан 09:00 ларда Янгийўл тумани Амир Темур кўчаси 21-уй қаршисида ҳайдовчи Ф.Ж. Gentra русумли транспорт воситасини бошқариб кетаётган вақтида йўл четидаги бетон устунга бориб урилган.

Ҳайдовчининг сўзларига кўра, у соғлиғи ёмонлашгани туфайли рул боқарувини йўқотиб, ЙТҲ содир этган.

Ушбу йўл-транспорт ҳодисаси натижасида ҳеч кимга зиён етмаган. Транспорт воситаси ва электр энергияси сими ўтган устун шикастланган.

Ҳолат юзасидан Янгийўл тумани ИИБ ЙҲХБ томонидан тегишли ҳужжатлар расмийлаштирилиб, суриштирув ишлари олиб борилмоқда.

Аввалроқ Тошкент шаҳри Чилонзор туманида Lacetti машинаси дарахтга бориб урилгани тўғрисида хабар берилганди.