Қирғизистон ва Тожикистон ўртасида авиақатновлар тикланди

Ҳаво қатнови 2021 йил май ойида тўхтатилган эди.

Фото: kaktus.media

14 март куни Тожикистон пойтахти Душанбедан учган йўловчи самолёти Қирғизистон пойтахти Бишкекдаги «Манас» халқаро аэропортига қўнди. Бу ҳақда маҳаллий ОАВ хабар берди.

Бу икки давлат ўртасида деярли тўрт йил ичида амалга оширилган илк парвоздир. Бишкекдан Душанбега парвоз тушдан кейин амалга ошиши кутилмоқда.

Шунингдек, Бишкек-Хўжанд ва Хўжанд-Бишкек йўналишлари бўйича авиақатновларни йўлга қўйиш режалаштирилган.

Қирғизистон ва Тожикистон ўртасидаги ҳаво қатнови 2021 йил май ойида тўхтатилган эди. Бу чегарадаги қуролли можародан кейин содир бўлган.

Бир кун аввал Тожикистон президенти Имомали Раҳмон Бишкекда Қирғизистон президенти Садир Жапаров билан учрашиб, парвозлар тикланишини маълум қилганди.

Музокаралар якунида томонлар икки давлат ўртасидаги давлат чегараси тўғрисидаги Битимни имзолади. Қирғизистон-Тожикистон чегарасида иккита назорат-ўтказиш пунктининг очилиши ҳам бўлиб ўтди.