Трамп Киевга Украинадаги АЭСни АҚШ назорати остига олишни таклиф қилди 

АҚШ президенти Доналд Трамп Украинадаги хавфсизлик билан боғлиқ вазият сабабли атом электр станцияларини бошқаришни ўз давлатига ўтказиш тарафдори эканини айтди. 19 март, чоршанба куни Трамп ва Украина президенти Володимир Зеленский ўртасидаги телефон қўнғироғидан кўп ўтмай, АҚШ давлат котиби Марко Рубио ва президентнинг миллий хавфсизлик бўйича маслаҳатчи Майкл Уолц Оқ уй раҳбарининг атом электр станциясини АҚШ мулкига ўтказиш Украина энергетика инфратузилмаси учун энг яхши ҳимоя бўлиши ҳақидаги сўзларини эълон қилди.

Рубио ва Уолцнинг сўзларига кўра, Трамп, улар ажойиб суҳбат дея таъриф берган суҳбатда, АҚШ «электр энергияси ва коммунал хўжалиги бўйича тажрибасидан фойдаланиб, ушбу станцияларни ишга туширишда катта ёрдам бериши» мумкинлигини таъкидлаган.

Трамп Patriot тизимлари билан ёрдам беришни ваъда қилди 

АҚШ маъмурияти вакиллари, шунингдек, Володимир Зеленский Киевга қўшимча Patriot ҳаво мудофаа тизимларини тақдим этишни сўраганини айтди. Рубио ва Уолцнинг таъкидлашича, Оқ уй раҳбари «хусусан, Европада мавжуд бўлган нарсаларни топиш учун у билан ҳамкорлик қилишга келишиб олган».

Рубио ва Уолцнинг сўзларига кўра, икки етакчи Курск областидаги вазиятни муҳокама қилган ва «жанг майдонидаги вазият ўзгаргани учун мудофаа идоралари ўртасида яқиндан маълумот алмашишга» келишиб олган.

Украина президенти Трамп билан суҳбатини «ижобий, жуда мазмунли ва самимий» деб атади. Зеленскийнинг сўзларига кўра, у америкалик ҳамкасбига миннатдорчилик билдирган.