АЭСда ишлаб чиқариладиган электр энергиясининг нархи қанча бўлади?

“Ўзатом” директори Азим Аҳмадхўжаев Alter Ego лойиҳасига берган интервюсида Жиззахда қурилажак кам қувватли АЭСда ишлаб чиқариладиган 1 кВт/соат электр энергияси нархи ҳақидаги саволга жавоб берди.

“АЭСда ишлаб чиқарилган электр энергиясининг нархи дунёдаги энг арзонларидан бири бўлади”, – деди у.

Аҳмадхўжаевнинг қўшимча қилишича, аниқ нарх якуний харажатлар оптималлаштирилиши ва техник-иқтисодий асос ишлаб чиқилгандан сўнг маълум бўлади. Жаҳон тажрибасидан келиб чиқиладиган бўлса, лойиҳанинг ўзини оқлаш муддати 15−20 йилни ташкил этиши мумкин.

“Станция – асосий ускуналар ва узелларни алмаштирмасдан 60 йилгача ишлайдиган энергия манбаидир. Шундан сўнг модернизация ва қўшимча жиҳозлаш ишлари олиб борилади. Кейин ҳам станция яна 20 йил ишлаши мумкин. Инвестицияларни қайтариш муддати ҳар қандай ҳолатда ҳам станциядан фойдаланиш муддатидан бир неча баравар кам бўлади. АЭС ўзини қоплаш нуқтасига чиққандан сўнг, 1 кВт/соат электр энергиясининг нархи 1,5−2 центни ташкил этиши мумкин”, деди “Ўзатом” раҳбари.

Унинг сўзларига кўра, АЭСнинг якуний қиймати ҳозирча номаълум, лекин умумий харажатлар 2 млрд доллардан ошмайди. Станция асосан ташқи қарзлар ҳисобига қурилади, давлат бюджетидан минимал даражада фойдаланиш режалаштирилган.