Марин Ле Пен 4 йиллик қамоқ жазосига ҳукм қилинди

Париж суди Франциянинг ўта ўнг «Миллий бирлашув» (собиқ «Миллий фронт») партияси етакчиси Марин Ле Пенни Европарламент маблағларини нотўғри сарфлаш иши бўйича айбдор деб топди, деб хабар беради BFMTV.

Суд ҳукми билан Ле Пенга тўрт йил муддатга озодликдан маҳрум этиш жазоси тайинланди (икки йил уй қамоғида ва икки йил шартли қамоқ жазоси). Шунингдек, унга беш йил давомида ҳокимият органларига сайланиш тақиқланди. Шундай қилиб, Ле Пен 2027 йилда ўтказиладиган президент сайловларида қатнаша олмайди.

Бундан ташқари, Ле Пен 100 минг евро миқдорида жарима ҳам тўлаши керак. Сиёсатчи ҳукм эълон қилинишини кутмасдан суд залини тарк этган.

«Миллий бирлашув»дан Европарламентга сайланган яна саккиз нафар депутат, шунингдек, 12 нафар парламент ёрдамчиси ҳам мазкур иш бўйича айбдор деб топилди. Иш ҳужжатларига кўра, айбланувчиларнинг ҳаракатлари натижасида етказилган умумий зарар 2,9 миллион еврони ташкил этмоқда.

Париж жиноий судида Марин Ле Пен бошчилигидаги «Миллий бирлашув» раҳбариятига нисбатан суд жараёни 30 сентябрда бошланган эди. Ле Пен ва бошқа 20 дан ортиқ партия вакиллари Европа Иттифоқи маблағларини ўзлаштирганликда ва Европарламент депутатларининг ёрдамчиларини сохта ёллаш орқали партияни яширинча молиялаштирганликда айбланган.

Айблов хулосасига кўра, «Миллий бирлашув»дан Европарламент депутатларига ёрдамчи сифатида ёлланган одамлар аслида Европа Иттифоқидаги ўз вакиллари учун эмас, балки шахсан Ле Пен ёки унинг партияси учун ишлаган. Шундай қилиб, «ёрдамчилари»дан бири — Терри Леге партия асосчиси Жан-Мари Ле Пеннинг қарийб йигирма йил давомида қўриқчиси бўлган, кейинроқ Марин Ле Пеннинг тансоқчисига айланган.