«Apache» вертолётини Эрон дрони уриб туширгани маълум бўлди. АҚШ ва Эрон яна зарбалар алмашди

Душанба куни Ҳўрмуз яқинида АҚШ армиясининг «Apache» зарбдор вертолёти қулагани ҳақида хабарлар тарқалганди. Кейинроқ АҚШ президенти Доналд Трамп бу ҳалокатни тасдиқлади. Трамп шундан сўнг «Apache» вертолёти уриб туширилганини жавобан Эронга зарбалар берилганини маълум қилди.

«Менимча, жавоб жуда кучли ва шиддатли бўлиши керак эди, мана шу зарба айнан шундай бўлди», деди Трамп сешанба куни ABC News телеканалига берган интервьюсида.

Reutersʼнинг ёзишича, АҚШнинг сўнгги зарбалари тахминан тўрт соат давом этди. АҚШ Марказий қўмондонлиги чоршанбага ўтар кечаси операция якунланганини маълум қилди. АҚШ расмийсининг сўзларига кўра, Эроннинг 20 га яқин нишонига зарба берилган.

Эрон давлат ОАВлари Ҳўрмуз бўғозидаги Кешм ороли ва Сирик порт шаҳрига ҳужум қилинганини хабар қилди. Маҳаллий аҳолига кўра, яқин атрофдаги Бандар-Аббосда, кейинчалик эса бўғозга кириш қисмидаги Жаск ҳудудида портлаш товушлари эшитилган.

АҚШ ҳарбийларига кўра, ҳужумларда бўғоз яқинидаги Эрон ҳаво мудофааси, ер усти бошқарув станциялари ва кузатув радар объектлари нишонга олинган.

Эрон жавоб зарбалари

Эрон Ислом инқилоби муҳофизлари корпуси чоршанба куни Америка зарбаларига жавобан Иорданиядаги АҚШ базаси ва Форс кўрфазидаги 21 та турли нишонларга ҳужум уюштирди.

Хусусан, Эрон томони Иорданиядаги АҚШнинг «Ал-Азрақ» базасидаги тўртта объектни узоқ масофали ракеталар билан нишонга олганини билдирган. Нишонлар орасида F-35 қирувчи самолётлари ангарлари ва қўмондонлик-бошқарув маркази ҳам борлиги айтилмоқда. Муҳофизлар корпуси АҚШнинг ҳар қандай кейинги ҳужумига «қақшатқич ва ҳал қилувчи» жавоб беришга тайёр экани ҳақиқда огоҳлантирди.

Иордания қуролли кучлари чоршанба куни Эрондан «Ал-Азрақ» йўналишида учирилган бешта ракетани тутиб олгани ва уриб туширганини маълум қилди. Ҳарбийларнинг қўшимча қилишича, ракеталарни уриб тушириш натижасида ҳосил бўлган парчалар Иордания ҳудудига тушган, бироқ ҳеч қандай талафот ёки моддий зарар келтирмаган.

Шунингдек, Муҳофизлар корпуси Кувайтдаги «Али Ас-Салам» базасини дронлар билан нишонга олган. Кувайт армияси ҳаво мудофааси тизимлари душман ҳаво нишонларига қарши ҳаракат қилаётганини билдирди ва аҳолини хавфсизлик кўрсатмаларига амал қилишга чақирди.

Аввалроқ Эрон кучлари Баҳрайндаги АҚШ Бешинчи флотига дронлар орқали ҳужум қилганини айтганди. Шунингдек, улар, агар ҳарбий ҳаракатлар давом этса, «янада қаттиқроқ жавоб қайтариш» билан таҳдид қилган. Кўп ўтмай Баҳрайн расмийлари огоҳлантириш сиренаси чалинганини ва ҳаво мудофааси тизимлари Эрон ҳужумларини қайтарганини маълум қилди.

АҚШ расмийсининг Reutersʼга айтишича, дастлабки баҳолашлар Эрон томонидан учирилган деярли барча ракета ва дронлар уриб туширилганини кўрсатмоқда.

Шунингдек, ҳозирча АҚШ ҳарбий хизматчиларига зарар етгани ёки объектлари шикастлангани ҳақида маълумотлар йўқ. Пентагон Эрон ҳужумлари юзасидан изоҳ бермади.

«Apache»нинг уриб туширилиши ва музокаралар

Исмини ошкор қилмаслик шарти билан гапирган АҚШ расмийсига кўра, «Apache» вертолёти Эроннинг бир томонлама зарба берувчи — камикадзе дрони томонидан уриб туширилган. Аввалроқ, Доналд Трамп вертолёт билан боғлиқ ҳодисада қатнашган америкалик икки учувчи жароҳат олмаганини айтганди.

Эрон давлат ОАВлари ҳарбий манбага таяниб, сўнгги 24 соат ичида Ҳўрмуз бўғозида ҳеч қандай ҳужумкор ҳаво-ҳарбий операциялари ўтказилмаганини маълум қилди.

АҚШ ҳарбийларига кўра, ўн миллионлаб доллар турадиган ҳужумкор вертолёт сешанба куни тонгги 03:00 ларда, Уммон қирғоқлари яқинидаги сувларда патруллик қилаётган вақтда қулаб тушган. Шундан сўнг, АҚШ Ҳарбий-денгиз кучларининг ер усти дрони икки нафар экипаж аъзосини топган ва қутқарган.

АҚШ ҳарбийларининг Марказий қўмондонлиги ҳалокат сабабларини келтирмади. Қўмондонлик икки экипаж аъзоси икки соатдан кейин қутқарилганини ва уларнинг аҳволи барқарор эканини билдирди.

Эрон ташқи ишлар вазири Аббос Ароқчи вертолёт воқеасига тўғридан-тўғри тўхталмади. Аммо у ўз баёнотида минтақадаги хорижий кучлар бахтсиз ҳодисалар ёки ўзаро отишмаларга дучор бўлиш хавфи остида эканини айтди.

«Хавфни камайтириш учун энг яхши ечим — уларнинг бу ердан кетишидир», деб ёзди у.

Трамп сешанба куни вертолёт воқеаси «катта муаммо эмаслигини» айтди ва «учувчининг аҳволи яхши» экани ҳақидаги гапларини қайтарди.

Бироқ, ушбу эпизод Яқин Шарқдаги кенг кўламли урушни тугатиш ва Ҳўрмуз бўғозини қайта очиш бўйича тинчлик битимига хавф туғдириши мумкин. Трамп Эрон ва АҚШ келишувга яқин эканини бир неча бор таъкидлаган бўлса-да, апрелда оташкесим кучга кирганидан бери музокаралар олдинга силжимаяпти.

Ливанда Исроил ва Ҳизбуллоҳ ўртасидаги жанглар давом этмоқда. Теҳрон Ҳўрмуз бўғози орқали кўплаб юк ташиш кемаларига қўйилган чекловларни сақлаб қолди. Вашингтон ҳам Эрон портларига ўз блокадасини жорий қилган.