Трамп тариф сиёсатини ўзгартирмаслигини айтди

«Менинг йўлим ҳеч қачон ўзгармайди. Бу ҳар қачонгидан ҳам бойиб кетиш учун ажойиб вақт!», деб ёзди Трамп.

Фото: Reuters

АҚШ президенти Доналд Трамп хориж маҳсулотларига янги божлар жорий этилиши билан боғлиқ сиёсатидан четлашмаслик ниятини тасдиқлади.

«Қўшма Штатларга келадиган ва жиддий пул сармоя киритаётган барча инвесторларга айтаман: Менинг йўлим ҳеч қачон ўзгармайди. Бу ҳар қачонгидан ҳам бойиб кетиш учун ажойиб вақт!», деб ёзди Трамп ижтимоий тармоқда.

Бундан ташқари, Трамп Хитойнинг 4 апрель куни эълон қилган жавоб тарифларини ҳам тилга олди.

«Хитой ваҳима билан нотўғри қилди ва бу уларнинг манфаатига тўғри келмайдиган ягона нарса», деди АҚШ президенти.

Трамп 3 апрель куни АҚШ ташқи савдо ҳамкорларига нисбатан «ўзаро» божлар жорий этилишини эълон қилди (рўйхатга жами 185 давлат киритилган). Божларнинг минимал базавий даражаси 10 фоизни ташкил қилади, бироқ бир қатор мамлакатлар учун божлар алоҳида ҳисобланади. Масалан, Хитой учун божлар 34%, Европа Иттифоқи учун - 20%, Япония учун - 24% бўлади.

Бу қарор Америка фонд бозорида пандемиядан буён кузатилмаган кескин қулашга олиб келди. Бир соатдан камроқ вақт ичида энг йирик компаниялар акциялари 2 трлн долларга арзонлашди.

4 апрель куни Хитой ҳукумати АҚШ товарларига 34 фоизлик қўшимча божлар жорий этишга қарор қилгани ҳақида хабар берилди. Ушбу чора-тадбирлар 10 апрелдан кучга киради.