Эронда қум бўронлари сабаб 800 дан ортиқ одам шифохоналарга мурожаат қилди

Эрон жануби-ғарбидаги Хузистон вилоятига ёпирилган қум бўронлари сабаб сўнгги 24 соат ичида шифохоналарга 802 киши мурожаат қилди. Бу ҳақда Тиббиёт фанлари университети ректори ўринбосари Мейсем Муази маълум қилди.

Унинг таъкидланишича, фуқаролар юрак ва нафас олишдаги муаммолар билан мурожаат қилган. 

«Уларнинг 92 нафари шифохонага ётқизилган, қолганларига текширувлардан кейин жавоб берилди», — дейди у.

Муази маҳаллий аҳолини, айниқса, болалар, ҳомиладор аёллар, кексалар ва респиратор касалликлари бор одамларни уйдан чиқмасликка чақирди. 

Хузистон метеорология хизмати пайшанба ва жума кунлари қум бўронлари кузатилиши сабаб «қизил даражадаги огоҳлантириш» эълон қилиб, бу инсонлар соғлиғига хавф туғдиришидан огоҳлантирган эди.

Эслатиб ўтамиз, апрел ўрталарида Ироқнинг марказий ва жанубий ҳудудларига ёпирилган қум бўронлари аҳоли саломатлигида жиддий муаммолар келтириб чиқарган ҳамда транспорт қатновларида узилишларни юзага келтирган эди. Ўшанда 3,7 мингдан ортиқ одам нафас олиш йўллари асоратлари билан тиббий ёрдам сўраб мурожаат қилган, улардан 1800 дан ортиғи шифохоналарга ётқизилганди.