Зеленский: Россия билан 30 кунлик ўт очишни тўхтатиш таклифи кучда қоляпти

Украина етакчиси Володимир Зеленский 7 май, чоршанба куни Киевнинг Россия ва Украина ўртасида камида 30 кун давомида ўт очишни тўхтатиш ҳақидаги таклифи ўз кучида қолаётганини айтди. «Биз дипломатияга имконият бериши мумкин бўлган бу таклифни қайтариб олмаймиз», деди у кундалик кечки видеомурожаатида.

Бироқ, Зеленскийнинг сўзларига кўра, айнан Россия Украина ҳудудига «янги зарбалардан бошқа жавоб бермаяпти». Бу «уруш манбаси ким эканини ҳаммага имкон қадар аниқ ва равшан кўрсатиб беради», — дея қўшимча қилди Зеленский.

«Россия ўз агрессиясини тўхтатиши керак, улар буни қилишга мажбур бўлади. Бу вақт масаласи. Уруш ҳамма учун, жумладан, тажовузкор учун ҳам йўқотишдир», — деди Украина президенти.

Зеленский ўз мурожаатида Россиянинг 7 май куни Украинага қилган ҳужумларини тилга олиб, Россия осмонининг «бугунги кунда беқарор» эканлигини «мутлақо адолатли» деб атади. Афтидан, у Украина учувчисиз учоқларининг Москва ва Россия Федерациясининг бошқа ҳудудлари йўналишида амалга оширилган оммавий ҳужумини назарда тутган бўлиб, бу Россия аэропортлари фаолияти ишдан чиқишига олиб келган. Пулково, Домодедово, Внуково, Шереметево, Қозон ва Сочи аэропортларида ўнлаб рейслар кечиктирилди.