Трамп Германияга Россия гази ўрнига американикини таклиф қилди

Президент Доналд Трамп Германия канцлери Фридрих Мерц билан учрашувда Америка гази ва нефти етказиб бериш ҳажмини ошириш ва буни АҚШ билан Европа Иттифоқи муҳокама қилаётган савдо келишувига киритишни таклиф қилди.

Европа Иттифоқи аввал ҳам Трампнинг савдо тақчиллиги ҳақидаги хавотирларини йўқотиш учун АҚШдан энергия харидларини кўпайтиришга тайёр эди ва энди бу Германия учун фойдали бўлиши мумкин.

Савдо келишуви Мерцнинг Оқ уйга биринчи ташрифи давомидаги асосий мавзулардан бири бўлди. Трамп бу АҚШ энергия экспортини оширишига умид қилмоқда ва Мерц буни амалга оширишга ёрдам бериши мумкин.

«Биз савдо-сотиқни яхши томонга ўзгартирамиз, деб ўйлайман. Бу асосан Европа Иттифоқи томонидан белгиланади, аммо Германия унинг жуда катта қисми ҳисобланади», деди Трамп.

Президент АҚШ энергия соҳасини қўллаб-қувватлашга ва бунинг учун янги бозорларни топишга ҳаракат қилаётганини таъкидлади.

«Бизда жуда кўп нефть ва газ бор», деди Трамп ва уларни савдо келишувининг бир қисмига айлантиришга умид билдирди.

2024 йилда Европа Иттифоқи Қўшма Штатлардан 51 млрд куб метр суюлтирилган табиий газ (СТГ) сотиб олди. Бу Европа импортининг 45 фоизини ташкил қилди. Умумий ҳажм 114 млрд куб метрни ташкил қилади. АҚШ энг йирик таъминотчи бўлди.

Россия 2 баробар кам СТГ сотди, бироқ унинг қувур линиясидаги газ етказиб бериш ҳажми 2021 йилдан бери 155 миллиард куб метрдан 40 миллиард куб метрга камайди. Худди шу даврда Европа Иттифоқига СТГ экспорти икки баравар кўпайди.

ЕИ 2027 йил охиригача Россия энергия таъминотидан бутунлай воз кечишни мақсад қилиб қўйган ва Европа Комиссияси тегишли режани тайёрламоқда, бироқ қатор давлатлар бунга қаршилик кўрсатмоқда. Венгрия ва Словакия қувур орқали газ олишдан воз кечишни хоҳламайди, Франция ва Бельгия эса буни иқтисодий ва қонуний равишда асосланишини истамоқда.