Шамол силжиши туфайли бир неча самолёт Тошкентга қўнолмади

Хавфли атмосфера ҳодисаси туфайли Тошкент аэропорти фаолиятига қисқа муддатли чеклов киритилди.

Фото: Uzbekistan Airports

Тошкент аэропортида шамол йўналишининг кескин ўзгариши туфайли маҳаллий вақт билан соат 16:03 да ҳаво кемаларини қабул қилиш ва жўнатиш бўйича вақтинчалик чекловлар жорий этилди. Бу ҳақда Uzbekistan Airports хабар берди.

Қайд қилинишича, бир нечта рейслар захира аэропортларига йўналтирилган:

- “Qanot Sharq” авиакомпаниясининг Камран - Тошкент йўналишидаги HH-2232 рейси (қўниш 16:35 да);

- “Uzbekistan Airways” авиакомпаниясининг HY-9732 Махачқалъа - Тошкент йўналиши бўйича (қўниш соат 16:42);

- “Uzbekistan Airways” авиакомпаниясининг Деҳли - Тошкент йўналиши бўйича HY-424 (қўниш 16:51) Самарқанддаги захира аэродромига йўналтирилди.

Шунингдек, “Air Astana” авиакомпаниясининг Остона - Тошкент йўналишидаги KS-123 рейси Туркистондаги захира аэродромга қўнди.

Таъкидланишича, маҳаллий вақт билан соат 16:30 да вазият барқарорлашди, Тошкент аэропортида ҳаво кемаларини қабул қилиш ва жўнатиш бўйича чекловлар бекор қилинди. Аэропорт одатдаги тартибда ишламоқда. Захира аэродромларга қўнган самолётлар Тошкентга қайтади.

Шуни таъкидлаш жоизки, шамол силжиши - бу қисқа масофа давомида шамолнинг йўналиши ёки тезлиги кескин ўзгарадиган ҳолат. У горизонтал ёки вертикал бўлиши мумкин ва самолётга горизонтал парвоз, кўтарилиш ёки қўниш пайтида жиддий таъсир кўрсатади.