YouTube жонли эфир ўтказиш учун минимал ёш талабини оширади

16 ёшдан кичик бўлган фойдаланувчиларга YouTubeʼда тўғридан тўғри трансляцияни амалга ошириш тақиқланади. Илгари ушбу қоида фақат 13 ёшдан кичик фойдаланувчиларга тааллуқли эди.

Фото: Getty images

2025 йил 22 июлдан бошлаб 16 ёшдан кичик бўлган шахслар YouTubeʼда тўғридан тўғри трансляциялар ўтказа олмайди. Бу ҳақда YouTube қўллаб-қувватлов маркази хабар берди.

Қайд этилишича, 13-15 ёшдаги ўсмирлар тўғридан тўғри эфирларни фақат катталар иштирокида олиб бориши мумкин бўлади. Илгари бундай қоида фақат 13 ёшдан кичик фойдаланувчиларга нисбатан амал қилган эди.

YouTube 22 июлдан сўнг катталар назоратисиз жонли эфир ўтказадиган 16 ёшдан кичик стримерлар чат ва бошқа имкониятлардан фойдалана олмаслиги мумкинлиги ҳақида огоҳлантирди.

Видеохостинг қоидаларни бузадиган тўғридан тўғри трансляцияларни ўчиради ва чекловга тушган ҳар қандай аккаунтга бошқа каналдан фойдаланган ҳолда стримлар ўтказиш тақиқланади. Бу эса охир-оқибат аккаунт фаолиятининг тўхтатилишига олиб келиши мумкин.

Тўғридан тўғри трансляция ўтказиш истагида бўлган 16 ёшдан кичиклар катталарга ўз каналини таҳрирчи, менежер ёки унинг эгаси сифатида фойдаланишга бериши керак. Бу ёшларга уларнинг каналига боғлиқ аккаунт орқали стрим бошлаш имконини беради. Олдин бу YouTubeʼдаги Live Control Room орқали амалга оширилган.