Британияда салкам 100 млн фунтлик кокаин партияси мусодара қилинди

Оғирлиги 2,4 тоннага етадиган контрабанда юки Панамадан келган кемадан топилган — улар контейнерлар остига яширилган бўлган.

Фото: PA images

Буюк Британияда ҳозиргача аниқланган энг йирик кокаин партияларидан бири мусодара қилинди — гиёҳванд моддаларнинг қиймати қарийб 100 миллион фунт стерлингга баҳоланмоқда, деб ёзади SkyNews.

Оғирлиги 2,4 тоннага етадиган контрабанда юки Темза дарёсидаги портга Панамадан келган кемадан топилган, улар контейнерлар остига яширилган бўлган.

Қайд этилишича, ҳуқуқ-тартибот органлари режалаштирилган етказиб беришни олдиндан аниқлаган ва юк мамлакат ҳудудига келган заҳоти уни қўлга олган. Мусодара қилинган гиёҳванд моддалар 96 миллион фунт стерлингга баҳоланмоқда.

Бундан ташқари, Дувр портида 170 килограмм кетамин, 4 мингта экстази таблеткалари ва йигирмага яқин ўқотар қуроллар ҳам аниқланган.

Июн бошларида Испания, Португалия, Буюк Британия, Колумбия ва АҚШ полиция бўлинмалари махсус операция ўтказиб, Канар оролларида салкам 4 тонна кокаинни мусодара қилганди. Унинг доирасида уюшган жиноий гуруҳнинг 48 аъзоси қўлга олинган.