Эстонияда вертолёт Болтиқ денгизига қулаб тушди

Вертолёт бортида етти киши бўлган ва уларнинг ҳеч бирига шикаст етмаган.

Фото: Irina Mägi

Болтиқ денгизининг Вилсанди ва Сааремаа ороллари орасидаги ҳудудга Эстонияда рўйхатдан ўтган вертолёт қулаб тушди.

Полиция ва чегарани қўриқлаш департаменти тақдим этган дастлабки маълумотларга кўра, вертолёт сувга қулаб, авариявий қўнишни амалга оширган. Вертолёт ағдарилган, аммо автоматик сувга қўниш тизими ишга тушгани боис чўкиб кетмаган.

Ҳаво кемаси бортида етти киши — беш нафар катта ёшли инсон ва икки нафар вояга етмаган бола бўлган. Уларнинг барчаси кабинадан чиқиб, вертолёт корпусида ёрдам етиб келишини кутган. Кўнгилли денгиз қутқарувчилар воқеа жойига 20 дақиқада етиб келган ва жабрланганлар Викати портига етказилган. Текширувлар давомида уларнинг ҳеч бири тиббий ёрдамга муҳтож эмаслиги аниқланган.

Полициянинг маълум қилишича, вертолёт Вилсандидан Таллинга учаётган бўлган. Ҳавода айнан нима содир бўлганини аниқлаш ишлари олиб борилмоқда. Тергов Авиация ҳодисаларини тергов қилиш маркази билан ҳамкорликда амалга ошириляпти. Вертолёт тадбиркор Вяйно Колдояга тегишли экани айтилмоқда.

Таъкидланишича, вертолёт аллақачон Яагараху портига олиб келинган. Ёқилғи тўкилиши ва атроф-муҳитнинг ифлосланишига боғлиқ ҳолат қайд этилмаган.