Tesla янгиланган Model Y электромобилини тақдим қилди

Хитойда Tesla Model Y электромобилининг янги кенгайтирилган версияси намойиш этилди.

Фото: MIIT

Tesla кузда Хитойда кенгайтирилган Model Y L моделини сотишни бошлайди, деб хабар берди CarNewsChina.

Электромобилнинг ўлчами катталаштирилди, қўшимча равишда, машина учта қатор ва олтита ўриндиқга эга бўлади. Илгари Tesla Model Y фақат беш ўриндиқли эди.

Кенгайтирилган Model Y анъанавий версиядан 179 мм узунроқ, ғилдирак базаси эса 150 мм узунроқ. Шу билан бирга, автомобил 12 от кучига (Y L 462 от кучига, оддий Y 450 от кучига эга) кучлироқ бўлди.

Tesla Model Y янги версиясининг расмий нархи ҳозирча номаълум, бироқ нашрнинг фикрича, у 300 минг юан (тахминан 570 млн сўм) атрофида бўлиши мумкин.

Tesla Model Y 2024 йилда Хитойда энг кўп сотилган автомобил бўлди – 480 мингдан ортиғи сотилган

Янгиланган Model Y 2025 йил бошида тақдим этилган эди. Рестайлинг қилинган модел Америка бозорига қараганда Хитойда эртароқ дебют қилди. Ташқи томондан, кроссовер Cybertruck пикапига ўхшаб кетади.

Тайёрлаган: Фозилбек Юсупов

#Хитой #Tesla #Model Y