Трамп сентябрда Буюк Британияга давлат ташрифи билан келади

Доналд Трамп давлат ташрифи учун иккинчи марта Буюк Британияга келади. Британияликлар биринчи марта Америка президентини иккинчи марта давлат ташрифи билан келишга таклиф қилди.

Фото: REUTERS/Kevin Lamarque

АҚШ президенти Доналд Трамп Буюк Британия қироли Чарлз III нинг таклифини расман қабул қилди ва 17-19 сентябр кунлари иккинчи давлат ташрифи билан Буюк Британияга келади, деб хабар қилди Букинҳэм саройи. Натижада Трамп Буюк Британияга олий даражадаги ташриф — давлат ташрифи билан икки марта ташриф буюрган биринчи АҚШ президентига айланади. Шу пайтгача инглизлар одатда иккинчи муддатга сайланган Америка президентларини фақат монарх билан чой ёки тушликка таклиф қиларди.

Трампнинг Буюк Британияга биринчи давлат ташрифи 2019 йилда амалга оширилган, уни қиролича Елизавета II кутиб олган эди. Букинҳэм саройидаги таъмирлаш ишлари туфайли қирол Чарлз III ва қиролича Камилла Трамп ва биринчи хоним Меланияни Виндзор қасрида меҳмон қилади.

Ташриф дастури ҳали эълон қилинмаган, аммо у Виндзордаги Авлиё Георгий залида расмий кутиб олиш маросими ва зиёфатни ўз ичига олиши мумкин. Маросимларда қироллик оиласининг барча юқори мартабали аъзолари, жумладан, Виндзор қасрида яшовчи Уэлс шаҳзодаси ва маликаси ҳам иштирок этади.

АҚШ президентининг ҳар қандай ташрифи қатъий хавфсизлик чоралари билан кечади ва бу сафар Трампнинг дастурида жамоатчилик учун очиқ тадбирлар бўлмайди. 2019 йилги ташрифи давомида Мэлл аллеясидан Букинҳэм саройигача бўлган анъанавий кортеж хавфсизлик нуқтайи назаридан бекор қилинди ва Трамп вертолётда ҳаракатланган эди.