Ўзбекистондан Британияга қовун экспорти йўлга қўйилди

Ўзбекистондан Буюк Британияга қовун экспорти йўлга қўйилди, деб хабар қилмоқда "Дунё" АА.

Фото: Kun.uz

Хусусан, жорий июл ойининг биринчи ўн кунлигида Буюк Британияга Uzbekistan Airways авиакомпаниясининг Тошкент–Лондон йўналишидаги авиақатнови орқали 10 тонна қовун етказиб берилди. Ўзбек қовуни ўзининг бетакрор таъми билан британияликларга катта қизиқиш уйғотмоқда.

Бундан ташқари, жорий йилда дуккакли маҳсулотлар, қуритилган мевалар ва ёнғоқлар, жумладан узум, гилос, майиз, нўхат, мош ва ўрик данаги мағзи экспорти фаоллашди. Мамлакатда етиштирилаётган мева-сабзавотлар ва қайта ишланган маҳсулотлар Британиянинг етакчи савдо тармоқларида сотилмоқда.

2025 йилнинг дастлабки беш ойи давомида Ўзбекистондан Буюк Британияга қишлоқ хўжалиги маҳсулотлари экспорти икки баробарга ошди.

Бу тенденция Ўзбекистонда агросаноат соҳасига қаратилаётган эътибор, маҳсулот сифатининг халқаро талабларга жавоб бериши ва логистика йўналишларининг такомиллашиб бораётганидан далолат беради.