Трамп Шотландияда: шамол турбиналари ва миграция Европага таҳдид солмоқда

25 июл, жума куни кечқурун Шотландияга етиб келган АҚШ президенти Доналд Трамп европаликларни шамол турбиналаридан воз кечишга ва миграцияни тўхтатишга чақирди.

«Европа узра парвоз қилганингизда ҳамма жойда гўзал далаларингиз ва водийларингизни бузаётган ҳамда қушларингизни ўлдираётган шамол турбиналарини кўрасиз», деди Трамп Глазго Прествик аэропортида. Унга кўра, шамол турбиналари денгизга ҳам зарар етказади. Трамп, шунингдек, Европани муҳожирларнинг «даҳшатли босқинини» тўхтатишга чақирди. Бу, унинг сўзларига кўра, шамол турбиналари Европа мамлакатлари гўзаллигини бузаётгани каби, Европани вайрон қилмоқда.

Шотландияда Трамп, жумладан, ўзининг иккита голф клубига ташриф буюриш, шунингдек, 27 июл куни Еврокомиссия раҳбари Урсула фон дер Ляйен билан учрашиш ниятида. 28 июл, душанба куни АҚШ президенти Буюк Британия бош вазири Кир Стармер билан учрашиши режалаштирилган.

Фон дер Ляйеннинг сўзларига кўра, Трамп билан учрашувда асосий эътибор «трансатлантик савдо алоқалари»га қаратилади. Шотландияга жўнаб кетиш олдидан АҚШ президенти Трамп эълон қилган тарифлардан қочиш имконини берувчи Европа Иттифоқи билан келишувга эришиш имкониятларини «жуда яхши» деб баҳолади. «Европа Иттифоқи билан келишувга эришиш имкониятимизни 50 га 50 деб айтган бўлардим», деди республикачи журналистларга.