Трамп Евроиттифоқ билан савдо битими тузилганини эълон қилди

АҚШ Евроиттифоқ билан савдо битими тузди, деб эълон қилди Америка президенти Доналд Трамп Еврокомиссия раҳбари Урсула фон дер Ляйен билан музокаралардан сўнг.  

Унинг сўзларига кўра, ЕИ АҚШдан 750 млрд долларлик энергия ресурсларини сотиб олади ҳамда Штатлар иқтисодиётига яна 600 млрд долларлик сармоя киритади. 

Шунингдек, Брюссел “катта миқдорда” ҳарбий техника сотиб олади, деди Трамп.

Ушбу битим натижасида Евроиттифоқ Трамп таҳдид қилган 30 фоизлик божлардан қутулиб қолади. АҚШ битим доирасида ЕИ маҳсулотларининг катта қисми, хусусан, автомобилларга 15 фоизлик бож киритади. Бунга қадар ЕИдан АҚШга машина ва эҳтиёт қисмлар экспорти учун бож миқдори 25 фоизни ташкил этарди. 

Трампнинг қўшимча қилишича, Брюссел АҚШ маҳсулотларига ҳеч қандай бож киритмайди.