Трампнинг ултиматумидан кейин Путин: «Орешник»ни серияли чиқара бошладик»

Кўзингиз тушган бўлса керак, Путин дўсти Александр Лукашенко билан бирга Карелия оролидаги черковга бориб у ердаги поплар билан қанақадир диний амалларни бажарди. Ўша пайтдаёқ Россия президенти жиддий бирор чиқиш қилиши аниқ эди. Чунки Путин одатда ниманидир эълон қилиш олдидан Лукашенко билан кўришади ва баъзан черковга боргани кўрсатилади. Бу гал иккала ритуал ҳам бир вақтда бажарилди.

Хуллас, Лукашенко билан учрашув вақтида Путин илк марта Трампнинг ўн кунлик ултиматумига жавоб берди: «Бу борада энг аввало шуни айтмоқчиманки, «Орешник» ракетасини серияли ишлаб чиқариш бошланиб, қуролли кучларга берилди».

Трамп «Путин менга жавоб бермаяпти», деб аразлаб юрганди, марҳамат, мистер Трамп, Путин жуда кучли жавоб берди: «менга ултиматум қўясанми? Марҳамат, мен «Орешник» деган ракетани серияли ишлаб чиқаришни бошладим, билганингни қил», деди. Хўш, энди кучингизни кўрсатинг-чи, жаноб Трамп, Путин сизга чинакамига «визов ташлади». Сизнинг қандай таъсир қилишини ўзингиз ҳам билмайдиган ғалати иккиламчи санкцияларингиз Россияни қўрқитмади.

Россия президенти учрашув давомида Истанбулдаги музокараларни ижобий баҳолади. Россиялик ҳарбийлар ичида бирорта атай берилган қурбон йўқлигини айтди. Путинга кўра, Украинанинг Часив Яр шаҳри бир неча кун олдин эгаллаб бўлинган экан. Шунингдек, Путин негадир Украинада коррупция кучли экани ҳақида гапирди.

Бу баёнотлар нега Лукашенко иштирокида айтилди, деб ўйлаётганлар учун бунинг сабабини тушунтираман. Путин Батканинг олдида ўзини эркин ҳис қилади. Сўзамол Лукашенко Путиннинг сўзларини тўлдириб туради. Масалан, икки президент журналистлар саволларига чиройли мебел кўринишига келтирилган тўнка устида туриб жавоб беришаркан Лукашенко Украинани «югуриб келиб Путин билан келишишга» чақирди. «Акс ҳолда бир, бир ярим ойда руслар ҳаммасини эгаллаб олади», деди Лукашенко. Путинга эгаллаб олади деган гап ёқмади, «Қайтарамиз, булар бизнинг ерлар», деди.

Яъни, бир неча йил аввал Украина ҳудудий яхлитлигини, хусусан, Қрим Украинаники эканини расман тан олган Путиннинг айтишича, ҳозирги Украина ерлари аслида русларники экан ва уларга нисбатан «эгаллаб олди» деган сўзни ишлатиш ҳатто Баткага ҳам мумкин эмаскан. Путин Украина ерлари қайси ҳужжатга кўра Россияники эканини айтмади.

Ана шунақа гаплар, азизлар. Путиннинг чиқишидаги энг муҳим гаплар шулар бўлди. Энди жуда қизиқ давр бошланмоқда. Трамп муддатни қисқартириб катта кетганди, Путин унга жуда кучли жавоб берди. Тўғрисини айтиш керак, унинг Карелия оролида Лукашенко билан дуэтда тайёрлаган жавоби чиндан муваффақиятли чиқди. Кўрамиз, энди Трамп қандай жавоб бераркин. Айтганча, муддат тугашига етти кун қолди...

Ўткир Жалолхонов тайёрлади
Тасвирчи ва монтаж устаси – Фахриддин Ҳотамов