Европада кучли ўрмон ёнғинлари давом этмоқда – фотосуратлар

Люксембург ҳудудига тенг келадиган ер майдони ёнғинлардан зарар кўрган.

Испаниядаги Момбелтран муниципалитети. Фото:Juan Medina / Reuters / Scanpix

Европада аномал даражадаги юқори ҳарорат ва қурғоқчилик туфайли бир неча ҳафтадан буён кучли ўрмон ёнғинлари бўлиб ўтмоқда. Қитъа жанубидаги Греция, Кипр, Испания ва Португалия каби мамлакатлар табиий офатдан энг кўп жабр кўрмоқда. Ўрмон ёнғинлари тўғрисидаги Европа ахборот тизими маълумотига кўра, 2025 йил июл ойи охирига келиб ёнғинлардан зарарланган жами ер майдони 292 минг гектардан ошган. Таққослаш учун: бу бутун Люксембург ҳудудидан каттароқ. Ўтган йилнинг шу даврига келиб ўрмон ёнғинларидан жабрланган ҳудудлар ҳажми 140 минг гектарни ташкил этганди. Айрим ҳудудларда кучли шамол олов тарқалишини осонлаштириб, вазиятни мураккаблаштирмоқда. Натижада қутқарувчилар бундай ҳудудларда ёнғин ўчоқларини бартараф этишнинг уддасидан чиқолмаяпти.